Аԥсны Аҳәынҭқарра адәныҟатәи аусқәа рминистр Олег Барцыц илагалажәа:

Ҳаҭыр зқәу Сергеи Виктор-иԥа, ҳаҭыр зқәу ҳколлегацәа, зегь раԥхьаӡа иргыланы, Сергеи Виктор-иԥа, Урыстәылатәи Афедерациа аҭааразы ааԥхьара ахьшәысҭаз, уаанӡа исзынашәышьҭыз адныҳәаларақәа, иара убасгьы гәык-ԥсыкала ҳахьшәыдышәкылаз азы гәык-ԥсык ала ҭабуп ҳәа шәасҳәарц сҭахуп.

Иара убас, исымоу аҭагылазаашьа схы иархәаны, гәык-ԥсык ала ишәыдысныҳәалар сҭахуп Урыстәыла даара иҳараку аҳамҭа – Аԥшьа ԥааимбар Андреи Аԥхьанаԥхьа иорден ахьшәаҭәашьоу. Ҳара, Аԥсны, ҳаҭыр ду ақәаҳҵоит, ахә ҳаракны иаҳшьоит Аԥсны Аҳәынҭқарреи Урыстәылатәи Афедерациеи реизыҟазаашьақәа рырӷәӷәареи, Урыстәылатәи Афедерациа ацхыраарала ҳинтересқәа рыхьчареи ирыдышәҵо аџьабаа.

Ҳҳәынҭқаррақәа рыбжьара имҩаԥысуа аусеицура амҽхак ҭбаауп. Иахьа уи инацҵаны агәацԥыҳәара аиуит. Ҳара иаабоит инарҭбаау аусеицура аганқәа жәпакы рҿы апроцессқәа шыӷәӷәахо, жәаҳәарада, Аԥсны Аҳәынҭқарра асоциал-економикатә ҿиара ахырхарҭагьы уахь иналаҵаны.

Ҳтәыла азы акыр зҵазкуа амҽхак ду змоу апроект дуқәа рынагӡара мҩаԥысуеит, ирацәоуп инарыгӡахьоугьы. Ахәҭакахьала, ари В. Г. Арӡынба ихьӡ зху Аҟәатәи Жәларбжьаратәи аҳаирбаӷәаза аартра ауп. 30 шықәса инареиҳаны ашьҭахь, ҳҳаирбаӷәаза аусура иалагеит, уи активла иаднакылоит ҳтәыла иаҭаарц зҭаху атуристцәа, зегь раԥхьаӡа иргыланы Урыстәылантәи иааз атуристцәа.

Аихамҩатә еимадара аусура акәзаргьы ихацыркуп, уажәнатә аусура иалагахьеит. Шәҩыла ауааԥсыра Аԥсны иаҭаауеит адәыӷба «Диоскуриа» ала. Ааигәа уи, Аиааира Амш аламҭалазы, гәырӷьара дула иҳадаҳкылеит.

Аҵарадырратәи амедицинатәи проект дуқәа рынагӡара иаҿуп. Урыстәыла Агәабзиарахьчара аминистрра анапхгара ҳтәылахь лассы-лассы сасцәаны иҳазнеиуеит. Иаҳа-иаҳа атехнологиа ҳаракқәа рыла еиқәыршәоу ацентрқәа раартра иаҿуп. Уажәазы ​​ахәыҷтәы хәышәтәырҭа аргылара активтә етап аҿы иҟоуп. Ииашаны ишазгәашәҭаз еиԥш ҳаиҿцаара аҩаӡара даара иҳаракуп.

Ҳҳәынҭқаррақәа рхадацәа Бадра Зураб-иԥа Гәынбеи Владимир Владимир-иԥа Путини рыбжьара ҩ-еиԥыларак мҩаԥысхьеит. Ҳәарас иаҭахузеи, ас еиԥш аимадара аҩаӡара ҳара ҳаизыҟазаашьақәа иҵегьы амч рынаҭоит, Аԥсны Аҳәынҭқарра ҭышәынтәаланы иҿиаразы аҭагылазаашьақәа аԥнаҵоит.

Урыстәылатәи Афедерациеи ҳареи ҳаимадараҿы акыр зҵазкуа аспектқәа иреиуоуп Аахыҵ-Кавказ арегион, Мрагыларатәи Амшын Еиқәа арегион аҿы ашәарҭадара азеиԥш контур, азеиԥш архитектура аиқәырхара. Ҳара уи даара ахшыҩзышьҭра аҳҭоит, ҳусеицураҿы абарҭ ахырхарҭақәа шаҟа ихадоу еилкаауа партниорцәак реиԥш, еиҩызцәак реиԥш аус еицаҳуеит.

Абри аҭагылазаашьа схы иархәаны, ҭабуп ҳәа шәасҳәарц сҭахуп МГИМОи, сара сзы игәакьоу аҵараиурҭа – Адипломаттә Академиеи рганахь ала аҵаратә программақәа шәахьрылахәу, аԥшьгамҭақәа ахьадыжәгало.

Уажәы, ҳазҭагылоу аамҭазы, агәыӷра ду ҳазҭоу еимадаратә формат ҿыцны иҟоуп Аԥсны Аҳәынҭқарра адәныҟатәи аусқәа рминистрра аусзуҩцәа Москаватәи Аҳәынҭқарратә Жәларбжьаратәи аизыҟазаашьақәа Ринститут (Ауниверситет) (МГИМО) аҿы рҵарадырра ахьеиздырҳауа. Агәра ганы сыҟоуп ҳҳәынҭқаррақәеи ҳжәларқәеи рыбжьара ииашоу аиҩызаратәи апартниортәи усеицура ԥхьаҟагьы аизҳазыӷьара амҩа ишацәхьамҵуа. Иҭабуп.

Урыстәылатәи Афедерациа адәныҟатәи аусқәа рминистр Сергеи Лавров иаԥхьажәа:

Ҳаҭыр зқәу Олег Мсас-иԥа,

Ҳаҭыр зқәу аҩызцәа,

Ҳара ҳзы игәахәара дууп ара шәбара.

Сара излеилыскаауа ала, ҳазҭоу ашықәс, мшаԥымзазы амаҵураҭыԥ ҿыц ахь шәнеира ашьҭахь Урыстәыла раԥхьаӡа акәны шәаҳҭааит. Шәҟәылатәи адныҳәаларақәа рнаҩсангьы, даҽазныкгьы аҭагылазаашьа схы иархәаны, хаҭала абри аус аҿы Аԥсны Аҳәынҭқарра аизҳазыӷьаразы ақәҿиарақәа шәзеиӷьасшьарц сҭахуп.

Ҳара иаҳгәалашәоит акыр аамҭа ара хәаахәҭратә хаҭарнакк иҳасаб ала аус аныжәуаз. Атауареикәыршара амҽхак есышықәса еизҳауан. Ҳәарада, уи азы Москватәи Ахәаахәҭратә хаҭарнакра алагала дууп.

Ҳҳәынҭқаррақәа шәышықәсала аҭоурых змоу еигәылацәоуп, еидгылаҩцәоуп. Уажәы ҳара ҳхадацәа рыӡбарақәа инарықәыршәаны, ашәарҭадареи ахьчареи рзы иаку аҵакыраҭыԥ шьақәҳаргылоит. Аԥснытәи асоциал-економикатә закәанԥҵареи Урыстәылатәи азакәанԥҵареи реишьаршәалара еиқәҳаршәоит, ареспублика ахықәкқәеи ацхыраареи рзы иҟоу аресурсқәа иахьынӡалшо хра злоу ахархәара рыҭаразы, атәанчахәытә, амедицинатә, аҵарадырратә уҳәа егьырҭ аусхкқәа рҿы иубарҭоу алҵшәақәа риуразы.

Аҳәынҭқаррақәа рхадацәа В.В. Путини Б.З. Гәынбеи ҳазҭоу ашықәс хәажәкыра 5; лаҵара 10 рзы астратегиатә мшхәаԥштәы шьақәдыргылеит. Уи еиҳа инарҭбааны иҭҵаахоит, ҳминистррақәа рхы аладырхәуеит.

Иахьа ҳара алшара бзиа ҳамоуп аҩганктәи апланқәеи анапынҵақәеи рылацәажәаразы, насгьы жәларбжьаратәи аренаҿы, зегь раԥхьаӡа иргыланы Аахыҵ-Кавказтәи арегион аҿы, ҳҽазышәарақәа ишрыцҵахо алацәажәаразы.

Шәбара сеигәырӷьоит!