Аҟәа. Рашәарамза 16, 2025 шықәса. Аԥсныпресс. Урыстәылатәи Афедерациа аекономикатә ҿиара Аминистрра аделегациа алархәны Аԥсны асоциал-економикатә ҿиара азҵаарақәа рыла аусуратә еилатәара мҩаԥысит иахьа Аҟәа ақалақь аҿы.
Урыстәылатәи аделегациа ахадараҿы дыҟоуп УА аекономикатә ҿиара аминистр ихаҭыԥуаҩ Дмитри Вольвач.
Аилатәара иалахәыз ирылацәажәеит Аԥсни Урыстәылеи рыбжьара асоциал-економикатә усеицуреи ХХ Анапхгарабжьаратәи акомиссиа аилатәара аҽазыҟаҵареи амҩаԥгареи рзы Анапхгарабжьаратәи акомиссиа ацхантәаҩцәа рыӡбамҭақәа рынагӡара азҵаарақәа.
Аиԥылара аартуа, атәыла аԥыза-министр Владимир Делба иҳәеит: «Ҳара 2022-2025 шш. асоциал-економикатә ҿиаразы апрограмма анагӡара абжьаратәи аихшьаалақәа ҟаҳҵоит. Ҳара зегьы анаҩсгьы 2026-2030 шш. Аԥсны асоциал-економикатә ҿиара азы иҿыцу аҳәынҭқарратә хықәкытә программа азнеишьақәеи амеханизмқәеи рышьақәыргыларазы аусеицура ҳазхиоуп».
Иара убасҵәҟьа иазгәеиҭеит, иҟоу апрограмма аеффективра шалоу, уи хра злоу алҵшәақәа шаанарԥшуа.
«Ҳара иаабоит хра злоу алҵшәақәа шыҟоу, аҩныҵҟатәи аалыҵ аизҳара, абиуџьет ахашәалахәқәа реизҳара, ибжьаратәу аулафахәы аҩаӡара ашьҭыхра, иара убас есышықәса изыцло ихадоу егьырҭ арбагақәа… Иааиуа апрограмма азнеишьақәа маҷк рҽырыԥсахит», - ҳәа иҳәеит Владимир Делба.
Аԥсни Урыстәылеи уи азы азинмчы змоу аусбарҭақәа аусуратә программақәа жәба еиқәдыршәараны иҟоуп; урҭ рышьаҭала аусхкытә программақәа аԥҵахоит, анаҩс асоциал-економикатә ҿиаразы аҳәынҭқарратә программа.
Владимир Делба иажәақәа рыла, амҩақәҵагатә хсаалақәа, аусхкытә программақәеи аҳәынҭқарратә программеи аԥсҭазааралшара рымазароуп хымԥада.
«Иузынамыгӡо ахыдҵақәа ҳара иқәҳаргылаӡом, ҳара конкретла алҵшәақәа раиура ҳазырхоуп», - ҳәа иҳәеит атәыла аԥыза-министр Владимир Делба.
