Аҳәынҭқарра Ахада ҷыдала иазгәеиҭеит Урыстәыла асоциалтә усхкы аҿы Аԥсны ианаҭо ацхыраара.

Аҳәынҭқарра ахада иациҵеит, ареспубликазы даара акыр шаҵанакуа абизнес маҷ адгылара апрограмма ацҵара. Сынтәа уи 326 миллион мааҭ еицазоурыжьуеит.

«Ҳәарада, уи атәыла аекономика аҿиара, иҿыцу аусуратә ҭыԥқәа раԥҵара иацхраауеит», - ҳәа иҳәеит Бадра Гәынба.

Урыстәыла аԥсуа усдкылаҩцәа альготатә кредитҭара аганахьалагьы Аԥсны адгылара ду анаҭоит.

«Ишыжәдыруа еиԥш, иҳаҩсыз ашықәсқәа рзы зхарџьхәыԥса 6 млрд. мааҭ инареиҳау апроектқәа рынагӡара алыршахеит. Уи адагьы, Урыстәыла Ахада Владимир Владимир-иԥа Путини сареи ҳаиԥылараҿы альготатә кредитҭара апрограмма ацҵаразы аиқәшаҳаҭра абжьаҵара алыршан», –  ҳәа иазгәеиҭеит Бадра Гәынба.

Дмитри Вольвач Аҳәынҭқарра Ахада аиԥыларазы иҭабуп ҳәа иаҳәо инаҵшьны иазгәеиҭеит, Урыстәылеи Аԥсни рыбжьара аимадара акыр аҽшарҭбааз. Уи игәалаиршәеит Аԥсны Кавказтәи аинвестициатә форум алахәхара шыҟаз.

 «Ааигәа Шәара аделегациа ду шәыцны Кавказтәи аинвестициатә Форум аҿы шәыҟан. Раԥхьатәи афорум инаркны ҳара ҳҽазаҳшәон Аԥсны ахатә стенд аманы Афорум алахәхара алыршара. Сгәы иаанагоит, усҟантәи шәыстенд даара ибзиан, даара ихатәран ҳәа, ацәыргақәҵа асасцәа зегьы рыбла хнакит. Уи иаҭааит Михаил Мишустини Алеқсандр Новаки. Аганқәа ргәы иҭоуп излагахьоу апроектқәа рынагӡара мацара акәымкәа, аҿыцқәа рылагарагьы», – ҳәа иҳәеит иара.

Дмитри Вольвач иажәақәа рыла, Аԥсны адгылара ду аиҭоит Урыстәылатәи Афедерациа Ахада Иусбарҭа анапхгаҩы ихаҭыԥуаҩ Сергеи Кириенко.  

«Шәара ижәдыруеит, иара шаҟа ахшыҩзышьҭра аҭаны, инарҵауланы ареспублика аҿы иахьа имҩаԥысуа апроектқәа зегьы дахьынӡарызлымҳау.  Аԥснытәи ҳколлегацәеи ҳареи аусуратә зҵаарақәа жәпакы рылацәажәара ҳалагахьеит. Иахьа арепсублика аҟны иҟоу Аинвестициатә Маҵзура имаҷууи ибжьаратәуи абизнес азы альготатә кредитҭаразы азыҳәамҭақәа рыдкылара иалагоит.  Сара сгәаанагарала, ҳара иҳалшеит акыр аинтерес зҵоу, ганкахьала анаӡарала иуникалу, даҽа ганкахьала уеизгьы аҩныҵҟатәи агәаҭаратәи агәазҭазааратәи амеханизмқәа злоу адгылара аформула амеханизмқәа раԥҵара», – ҳәа иҳәеит Дмитри Вольвач.

Иара 2025 шықәсазы Урыстәылеи Аԥсни имаҷууи ибжьаратәуи анаплакра адгылара   300 млн. мааҭ инареиҳаны еицазоурыжьуеит ҳәа агәыӷра шимоу иҳәеит.

«Ҳара уи даараӡа ҳазырхоуп, уи азы иаԥаҳҵоит ареспублика аҿы иҿыцу имаҷууи ибжьаратәуи анаплакра аҩаӡара. Иҟазар ҟалап иахьа аусдкылара знапы алазкхьоу, урҭ ироуа адгылара иабзоураны ашәахтә шәҟәҭагалара иахысны еиҳа зыҩаӡара ҳараку амаҵзурақәа рынагӡара азы алшара роуеит. Еилкаауп, уи атуристтә бизнес, афатә аалыҵқәа рҭыжьра ааглыхра, уҳәа аусхкқәа шраку. Сара сгәаанагарала, уи даараӡа акыр аҵанакуеит. Насгьы Шәара ииашаны иазгәашәҭеит, сара сзыҳәаны уи акыр аҵанакуеит, Владимир Владимир-иԥа Путин шәара иҟашәҵаз ааԥхьареи арҭ ашықәсқәа рзы еицымҩаԥаагаз аусеицуреи ирыбзоураны, Шәара иҟашәҵаз аҳәара дахаҵгылеит, ҳаргьы шьҭа ҳара ҳфинанстә институтқәа рыла апроект дуқәа альготатә кредитҭара иацаҳҵалоит, уи даараӡа акыр аҵак ду амоуп», – ҳәа иҳәеит Дмитри Вольвач.