Аҟәа. Нанҳәамза 29, 2025. Аԥсныпресс. Нанҳәамза 3 – 4 рзы С.Ҷанба ихьӡ зху Аԥсуа драматә театр асценаҿы имҩаԥысраны иҟоуп Аҿартә аҳәынҭқарратә театр аспектакль «Ашьажәҩы иҭаацәа» аԥхьарбара.
Ари баша спектакльӡам, ари апсихологиатә триллер ауп, ахбыџтә аудиториа ирзырхоу Васили Сигариов ипиеса «Ахәарҭлаӷь иҭаацәа» («Семья Вурдалака») инарҵауланы иҿыцны азхәыцра, аҵак ҿыц аҭара ауп. Арежиссиор Дмитри Акимов (Красноиарсктәи атәылаҿацә Мотыгинтәи адраматә театр арежиссиор хада) ихадоу, иҵару атема —анаркоманиа апроблема ҷыдала дазааҭгылеит.
«Ари иуадаҩу апроблемақәа ирықәшәаз аҭаацәа ртәы зҳәо жәабжьуп. Асиужет анаркотикқәа здызкыло афырхаҵа хада иани изааигәоу аԥҳәызбеи иара еиқәырхаразы аӡбамҭа анрыдыркыло аамҭахәҭа амҽханакуеит», — ҳәа еиҭеиҳәеит арежисиор.
Апиеса аԥсшәахь еиҭеигеит Нарсоу Абыхәба.
Анырра ду шәызҭо, иӷәӷәоу, даара актуалра злоу аҭоурых жәбарц шәҭахызар шәааи аспектакль ахәаԥшразы.
