«Аӡынтәи аамҭахәҭазы аԥсабаратә ҭагылазаашьақәа ирыхҟьаны ҳара Лазаревск ахыхь аус ҳзуӡом, Аԥсны аӡыммҽак иахьаҵанакуа акәзар, Амшын Еиқәа еиҳа иҭынчуп, ӷәӷәала ацәқәырԥара шамахамзар иҟалаӡом», - ҳәа ажурналистцәа дрыҿцәажәо иазгәеиҭеит иара. Амшынбаӷәаза адиректор Хада Иури Владимиров амшынбаӷәаза «Шәача» «Акомета» адәықәҵара аҽшазыҟанаҵоз атәы еиҭеиҳәеит.

«Шәачатәи амшынбаӷәаза аганахьала уи аинфраструктура зегьы ас еиԥш иҟоу аӷбақәа рыдкылра иазхиоуп», – ҳәа иҳәеит иара.

Аԥсни Урыстәылеи амшынтә еимадара рыбжьаҵаразы аӡбамҭа рыдыркылеит ԥхынгәымза 12 рзы Аҟәа ақалақь аҿы имҩаԥысыз анҭыҵтәи аилатәара аҿы. Уи рхы аладырхәит Аԥсны Ахада Бадра Гәынбеи Урыстәылатәи Афедерациа Ахада Иусбарҭа аиҳабы актәи ихаҭыԥуаҩ Сергеи Кириенкои.  

Иццакны иныҟәо апассаџьыртә ӷба «Комета 120М» Ҟрым, Феодосиа иҟоу аӷбаргыларатә зауад «Море» аҿы иҟарҵеит. Усҟан уи анапхгара нанагӡон рыбинсктәи азауад «Вымпел». Аӷба иахьӡуп «Космонавт Павел Попович». Асовет Еидгыла аԥырҩы-акосмоавт №4, ҩынтә Асовет Еидгыла Афырхаҵа ҳәа ахьӡ зыхҵаз, акосмостә ӷба «Восток-4» апилот, акосмостә ӷба  «Союз-14» акомандаҟаҵаҩ, «Беркут» ҳәа азхьӡ ҷыда змаз акосмонавт Павел Попович ихьӡ ахәбатәи «Акомета»  ачарҭган иануп.   Аӷба аҩныҵҟа Павел Роман-иԥа Попович иԥсҭазаареи иусурамҩеи аазырԥшуа афотосахьақәеи абиографиеи зну астенд шьақәыргылоуп.