Аконкурс ахықәкы хаданы иҟоуп  – атуристтә усхкы аҿиара, ареспублика атуристтә ҭеиҭыԥш аиӷьтәра, атуристтә сезон ацҵара, атуризм аусхкы аҿы аинновациатә практикақәа рметодикақәа рҵара, иара убас Аԥсны иҿыцу аусуратә ҭыԥқәа раԥҵара  иазырхоу, еиҳа аперспективра злоу атурисстә аԥшьгарақәа раарԥшра, адгылара рыҭара, рынагӡара.

Апроект «Зысасгәашә аату Аԥсны» атәылазы ҷыдала актуалра злоу ахырхарҭа – атуризми асасдкылареи русхкы аҿиара иацхраауеит. Аԥыза-министр Владимир Делба иҳәеит Аԥсны егьырҭ атуристтә тәылақәа зегь реиԥш акурорттә аамҭахәҭаз аҳәаа ҟамлартә иҟаҵатәуп ҳәа.

Иара иазгәеиҭеит, акыр шықәса шҵуа атуризм аекономика ахырхарҭа хадақәа иреиуаны иалкаауеижьҭеи, ааԥхьара ҟаиҵеит аицлабра «Зысасгәашә аарту Аԥсны» рхы аладырхәырц.

«Ари аус зырҿио ауаа ралархәра даара акраҵанакуеит. Урҭ рышьаҭала акыр зҵазкуа аӡбарақәа рыдыркылалоит, урҭ ҳҳәынҭқарра аҿиаразы амч арҭоит», — ҳәа азгәеиҭеит Владимир Делба.

Аицлабра абшьыргеит «Аԥсны акоманда» афиналистцәа, шьаҭас иамоуп аплатформа «Урыстәыла – алшарақәа ртәыла» апроект «Асасдкылара аҟазацәа».

Уи аԥхьа, Аԥсны Ахада Бадра Гәынбеи УА Ахада Иусбарҭа аиҳабы актәи ихаҭыԥуаҩ Сергеи Кириенкои рԥылараан, аконкурс «Аԥсны акоманда» афиналист Максим Гәымба иреиӷьу атуристтә аԥшьгарақәеи атуристтә индустриа аԥхьагылаҩцәеи рконкурс амҩаԥгара азԥхьагәазҭо апроект «Зсасгәашә аарту Аԥсны» адгалара мҩаԥигеит.  Апроект адгылара анаиу ашьҭахь, Максим Гәымба аконкурс аҳәаақәҵаҩыс дҟалеит. Иара ареспублика атуристтә усхк аҿы иҵару апроблемақәа рыӡбареи акадртә резерв аԥҵареи ирызкуп иҳәеит апроект аҳәаақәҵаҩ Максим Гәымба Sputnik аҿы имҩаԥгаз апресс-конференциаҿы.

Алахәылацәа ареспубликаҿы инагӡахо атуристтә проект ҿыцқәа раԥҵара иалахәхоит.

«Ҳхықәкытә аудиториа ҭбаауп. Уи рхы аладырхәыр рылшоит апрофильтә факультет астудентцәа, атуристтә усхк ахаҭарнакцәа, атуристтә маҵзурақәа мҩаԥызго аиҿкаарақәа. Апроект алахәхара зҭаху нанҳәамза 7рзы асаит (https://welcome.abkhazia.team/) аҿы ашәҟәы рыҽҭаргалароуп, — ҳәа иҳәеит Максим Гәымба.

Аԥсны атуризм аминистр Асҭаамыр Логәуа атуризм Аминистрра иарбоу апроект анагӡараҿы инанагӡо ароль инаҵшьны азгәеиҭеит. Уи ари аконкурс аусхкы аҿиаразы иӷәӷәоу импульсны ишыҟало агәра игоит ҳәа иазгәеиҭеит. Атуризм аминистр Асҭамыр Логәуа иажәақәа рыла, аицлабра  «Зысасгәашә аарту Аԥсны» аԥсшьаҩцәа рхыԥхьаӡара аизҳара иацхраауеит.

«Ари аԥхынтәи аԥсшьара анаҩсгьы ауаа аднаԥхьалар алшоит, еиҿукаар ҟалоит ашьхатә туризм. Арҭ зегьы иахьа инагӡатәуп ауаа рацәа адԥхьаларазы», - ҳәа инаҵшьны иазгәеиҭеит иара.

«Урыстәыла – Алшарақәа ртәыла» ахантәаҩы ихаҭыԥуаҩ Дмитри Гужелиа иажәақәа рыла, апроект алахәылацәа мызқәак рыҩнуҵҟа аҵара ирхысуеит, урҭ рылҵшәақәа инарықәыршәаны аԥхьатәи аихшьаалақәа ҟарҵоит.

«Аԥсны аҩнуҵҟа амаҵзуреи атуризм аҿиареи рзы аидеиақәа шәымазар аицлабрахь шәааи. Шәара шәыхшыҩҵакқәа азгәаҭаны алкаақәа ҟаҳҵоит, анаҩс гәыԥҩык алҳкаауеит», - ҳәа иҳәеит иара.

Аконкурс «Зысасгәашә аарту Аԥсны» Аԥсны атуризм аҿиара иазҿлымҳау, зыдгылара мҩаԥгоу   21 хырхарҭа руак аҳәаақәа ирҭагӡаны аинновациатә идеиақәеи апроектқәеи зхатә идеиақәа рыдгалара золшо зегьы рзы иаартуп.

Аконкурс аиҿкаара ахахьы иагеит Ареспублика Аԥсны Ахада Иусбарҭа агуманитартә проектқәа Рнапхгараҭара. Аицнагӡаҩ иаҳасабала иқәгылоит  Урыстәыла Ахада иҟны иҟоу аплатформа «Урыстәыла алшарақәа ртәыла, партниорс иҟоуп Аԥсны атуризм Аминистрра. Аиаара ргоит 20-ҩык инареиҳаны. Урыстәыла ахада Иусбарҭа анапхгаҩы актәи ихаҭыԥуаҩ уаанӡа иҳәахьан, урыстәыла хаҭа-хаҭала афиналистцәа зегьы рзы миллион мааҭк рҟынӡа агранттә цхыраара ахахьы ишаго, уи азымхозар, урыстәылатәи абанк аҟыны акредит аиура шалыршахо.

Источник: https://www.apsnypress.info/ru/home/novosti/item/16801-gostepriimnaya-abkhaziya-zhitelej-respubliki-priglashayut-prinyat-uchastie-v-novom-turisticheskom-proekte

© АПСНЫПРЕСС.