Иара раԥхьа дызҭааз аобиектқәа иреиуоуп ақалақь аполиклиника. Ари амедусбарҭа аҿы иҟаӡам иахәҭоу амедицинатә маругақәа, иаԥҵам апациентцәа рыдкыларазы ихымԥадатәиу аҭагылазаашьақәа. Иҟоу апроблемақәа шмаҷымгьы, аполиклиника амедицинатә персонал шықәсык ала 40 нызықьҩык апациентцәа рыдыркылоит.  

Аполиклиника аҿы иҟоу аҭагылазаашьеи уи  аусушьеи ртәы еилкааны, Бадра Гәынба ачымазцәа рыдкылареи урҭ зыквалификациа ҳараку амедицинатә цхыраара рыҭареи рзы аҭагылазаашьақәа реиӷьтәразы зыԥшра ҟамҵакәа ауснагӡатәқәа мҩаԥгатәуп ҳәа инаҵшьны иазгәеиҭеит.

«Амедицинатә цхыраара аиуреи уи ахаҭабзиареи ишиашоу ауааԥсыра ргәабзиара анырра анаҭоит», – ҳәа инаҵшьны иазгәеиҭеит Аҳәынҭқарра Ахада.

Бадра Гәынба иара убас даҭааит зеиҭашьақәыргыларазы аусурақәа аамҭала иаанкылаз аспорттә зал. Уи атәыла анапхгара афинансыркра мҩанагарц, Шьаҭанкылатәи аргыларазы Аусбарҭа иарбоу аобиект ҳазҭоу ашықәс нҵәаанӡа ахархәарахь рыҭара алнаршарц азы анапынҵақәа ҟаҵеит.

Аҳәынҭқарра Ахада даҭааит Афон Ҿыцтәи апарк аҿы иҟоу, хатәгәаԥхарала Аԥсны еибашьуаз, еицырдыруа апоет Алеқсандр Бардадым инышәынҭра. Иарбоу апарки анышәынҭреи гәыгәҭажьны иҟоуп. Асасааирҭатә комплекс ареконструкциа иаҿу аусдкылаҩцәа рхахьы иргеит апарктә зона аҭеиҭыԥш аиҭашьақәыргылара, иара убас Алеқсандр Бардадым иԥсыжырҭа арҽеиреи, анаҩсгьы уи ҷыдала ахылаԥшра аҭареи.

Аҳәынҭқарра Ахада даҭааит иара убас аихамҩатә вокзал, араҟа аиҭашьақәыргыларатә усурақәа мҩаԥысуеит. Урҭ рхыркәшара ҳазҭоу ашықәс нҵәаанӡа иазԥхьагәаҭоуп.

Авокзал ахыбра аҭоуых-культуратә баҟақәа рзы ишьақәыргылоу анормақәа зегьы инарықәыршәаны еиҭашьақәыргылахоит.