АЖӘАБЖЬҚӘА

вчера 17:27

Аҳәынҭавтоинспекциа аусзуҩцәа цәыббрамза раԥхьатәи амшқәа рзы аҵарашықәс алагара инамаданы ашколқәа рааигәара русура дырӷәӷәоит.

Аҟәа. Нанҳәамза 30, 2025 шықәса. Аԥсныпресс. Аԥсны аҩныҵҟатәи аусқәа Рминистрра Аҳәынҭқарратә автоинспекциа Аусбарҭа аиҳабы Дамеи Аҩӡба аҵарашықәс алагара аламҭалазы атәылауаа рахь ааԥхьара ҟаиҵеит. Иара арҵаҩцәеи аҭаацәеи Адырра Амш рыдиныҳәалеит, убри аан амҩақәа рҿы ашәарҭадара, аиҳарак цәыббрамза раԥхьатәи амшқәа рзы, амҩадуқәа рҿы ашколхәыҷқәа еиҳа ианырацәахо, акыр агәҽанызаара аарԥшра шхымԥадатәиу азгәеиҭеит.

«Аҵарашықәс ҿыц алагара есымша амҩақәа рҿы ахәыҷқәа рхыԥхьаӡара ацлара иадҳәалоуп, уи ахәыҷқәа злаху амҩа-транспорттә машәырқәа рыҟалара ашәарҭара акыр иазнарҳауеит», - ҳәа иазгәеиҭеит  Дамеи Аҩӡба.

Иара иажәақәа рыла Аҳәынқарратә Автоинспекциа аусзуҩцәа ашколқәа рааигәара русура дырӷәӷәоит, убри аан уи атәылауаа рахь ааԥхьара ҟаиҵеит азинхьчаратә усзуҩцәа ирыцхраарц — амҩатә ԥҟарақәа ртәы ахәыҷқәа ирзеиҭарҳәарц, амҩа анеихырҵәо аамҭазы аҭелқәеи алымҳахаҵақәеи рхархәара шыҟамло.

Уи иара убас амашьынарныҟәцаҩцәа рахь ааԥхьара ҟаиҵеит аиҳарак ашколқәа, аспорттә ҭыԥқәа, амҩаеихысырҭақәа, ахәыҷқәа ахьыҟоу егьырҭ аҭыԥқәа рҿы амашьына аныҟәцараан ҷыдала агәҽанызаара аадырԥшларц. Дамеи Аҩӡба иара убас инаҵшьны иазгәеиҭеит автомашьынақәа рҿы иҟазарц шхыԥмԥадатәиу ахәыҷы даанызкыло амаҟақәа, амашьына ашәқәа аблокировка аҟаҵара шахәҭоу.


Read 36 times
Image
Image
Image
Image
Информационное Агентство "АПСНЫПРЕСС" (РГУ "АПСНЫМЕДИА") © 2025
Все права на любые материалы, опубликованные на сайте, защищены в соответствии с абхазским и международным законодательством об авторском праве и смежных правах. Использование любых аудио-, фото- и видеоматериалов, размещенных на сайте, допускается только с разрешения правообладателя и ссылкой на www.apsnypress.info.