Асцена ахь ицәырҵит  асолистцәа Клаудиа Павоне (сопрано), Саид Гобечиа (баритон). Акомпонимент нанагӡон Марко Титотто напхгара зиҭо Виченцатәи аконсерваториа аоркестри, Альберто Пелозина асахьаркыратә напхгара зиҭо «Kairos Vox» ахори.

Саид Гобечиа инаҵшьны иазгәеиҭеит, афестиваль акыр шықәса раахыс ахәаԥшцәа ишрыднагало апрограмма шьахәқәа, ишааныртуа ахьӡ ҿыцқәа, артист ҿарацәа ишрыцхраауа.

Саид Гобечиа иажәақәа рыла, уи насыԥ иман ҳәа иԥхьаӡоит ари афестиваль алахәхаразы алшара ахьоуз:

«Сара насыԥ сыман ҳәа исыԥхьаӡоит ари зеиӷьаҟам ақалақьи иааизакны Авенето арегион азы акыр зҵазкуа афестиваль алахәхаразы алшара ахьсоуз.  Акыр шықәса раахыс афестиваль апублика илыԥшааху апрограмма рзеиқәнаршәоит, иҿыцу ахьӡқәа рӡыргара мҩаԥнагоит, артист ҿарацәа адгылара рнаҭоит.  Сара сзы Брамс ирҿиамҭа «Реквием» анагӡара акыр ацәанырра  сызцәырнагеит. Ари аҩымҭа зыԥсы ҭоу рахь ирхоуп, агәымшәареи агәыӷреи рыланаҵоит».

Аренессанс аамҭа зыԥсы ҭоу аҭынха

Атеатр Olimpico in Vicenza — ари архитектура ашедевр анаҩс, активла аус зуа акультуратә центрны иҟоуп. 1580–1585 шш. рзы Андреа Палладио ипроект ала иргылаз, адунеи аҿы ахыб аҵаҟа иҟоу  рҟынтәи ижәытәӡатәу театрны иԥхьаӡоуп.  

Атеатр адунеи зегьы аҟынтәи ахәаԥшцәа аднаԥхьалоит, уи аклассикатә музыка афестиваль Omaggio a Palladio, аџьаз афестиваль Vicenza Jazz Festival, аклассикатә пиесақәа реиԥш ҳаамҭазтәи аинтепритациақәагьы рыдгалара ахьымҩаԥысуа амузыкатә фестивальқәа Le settimane musicali, Vicenza in Lirica и Spettacoli Classici al Teatro Olimpico рзы есымшатәи плошьадканы иҟоуп.