Ааигәа Аԥсны Ахада Бадра Гәынба аминистрцәа Реилазаара ирҿыцу асистема шьақәирӷәӷәеит. Уажәшьҭа аԥыза-министр хәҩык ахаҭыԥуаҩцәа имоуп, урҭ рхыԥхьаӡараҿы иҟоуп иара убас  аминистр имаҵура назыгӡогьы.  

«Иубаратәы иҟоуп Аԥсны анапхгараҭаратә усура амҩаԥгараҿы урыстәылатәи амодель ишазхьаԥшуа. Мҽхакыла аиԥшымзаарақәа ыҟазаргьы – Урыстәыла дууи Аԥсынтәыла хәыҷи рыбжьара – агеографиатә еизааигәареи аҩтәылак ирыбжьоу аимабзиаратә еизыҟазаашьақәеи ирыбзоураны, аминистррақәеи ахылԥшырҭақәеи рыҩаӡараҿгьы уахь иналаҵаны,  урыстәылатәи аԥышәа инақәыршәаны аструктура аоптимизациа мҩаԥысуеит», – ҳәа аҳәамҭа ҟаиҵеит Алеқсеи Мартынов.

Аполитолог иазгәеиҭеит, иҿыцу Бадра Гәнба икоманда иалхын, раԥхьа иргыланы ауаа рыпрофессионалтә ҟазшьақәеи рзанааҭтә лшарақәеи рыла, уи жәаҳәарада, Аԥсны аҩныҵҟа аполитикатә климати жәларбжьаратәи аусеицура ашьақәыргылареи хра злоу анырра анаҭоит. Иаагозар, Урыстәыла иҟаз Аԥсны ԥыхьатәи ахәаахәҭратә хаҭарнак, алхрақәа раан уажәы аҳәынҭқарра иахагыло иоппонет Олег Барцыц атәыла аҩныҵҟатәи аусқәа рминистр имаҵураҭыԥ ааникылеит.  

«Иара алхрақәа раан аоппонентс дшыҟазгьы, иара иидеиақәа, иҟыбаҩ ахшыҩзышьҭра аҭахеит, саргьы агәра ганы сыҟоуп, Олег Барцыц хара имгакәа илоу аусуралшара иреиӷьу аганахьала ишааирԥшуа», - ҳәа иажәа иацҵо иҳәеит Алеқсеи Мартынов.

Иара убас атәыла анапхгара абаҩхатәра злоу анапхгаҩцәа ралԥшаара азы аконкурс «Аԥсны Акоманда» мҩаԥыргеит. Аиааира згаз иҿыцу анапхгара аҿы аусура рыдыргалахьеит. «Ари убасҵәҟьа Аԥсны қәҿиарала ахархәара зауз хра злоу урыстәылатәи ԥышәоуп. Уаанӡа акыр аамҭа иалагӡаны аҭыԥ змаз уала-ҭахылатәи ауаажәларратә еилазаара ашьақәыргылара мап ацәкуп, уажәшьҭарнахыс акырӡа аҵанакуеит Ареспублика Аԥсны аҿиара бзиа азҭаша аеффективра злоу аӡбамҭақәа рыдкылара ахшыҩзышьҭра ӷәӷәа аҭара», – ҳәа иажәа хыркәшо иазгәеиҭеит аексперт.