Аҟәа. Цәыббрамза 18, 2025 шықәса. Аԥсныпресс. Аԥыза-министр ихаҭыԥуаҩ, аҩныҵҟатәи аусқәа рминистр Роберт Кьиут Урыстәыла аҩныҵҟатәи аусқәа Рминистрра ала еиҿкаау, аекстремизм аидеологиа аларҵәара апроблема азы Москва имҩаԥысуа V Жәларбжьаратәи аконференциа ихы алаирхәуеит.
Роберт Кьиут «аҳәынҭқарра анҭыҵынтәи иаауа ашәарҭарақәа рҭагылазаашьаҿы аҿар рекстремизм апрофилактика аганахьала Ареспублика Аԥсны аԥышәа» ҳәа ажәахә ҟаҵо дықәгылеит. Уи, ахәҭакахьала, Аԥсны – ари аибашьра атрагедиа зхызгаз, аха аҭынчра, асуверенитет, аҩныҵҟатәи аҭышәынтәалара реиқәырхара зылшаз ҳәынҭқарроуп ҳәа иазгәеиҭеит.
«Ҳара ибзианы еилаҳкаауеит аҭышәынтәалара ахьынӡаушәшәыроу, аҿар – зымариа акра еиҳа иуадаҩу, ҷыдала азнеишьа зҭаху ауаажәларра рыхәҭа ауп. Аиҳарак уи арадикалтә идеологиақәа рахь ралагалара азы аҽазышәарақәа роуп изыдҳәалоу. Ҳара имариоу, аха убри аан ипринципиалтәу аилкаара: аекстремизм агәҽанҵара аарԥшреи аԥхьырҟәҟәаареи еиҳа имариоп анаҩс уи аҿагылара аасҭа ҳәа иҳаԥхьаӡоит. Убри аҟнытә ҳара ҳусура заа адырра, агәҽанызаара аарԥшра, заара аарԥшреи асистематә профилактикеи рлогика ала ишьаҭаркуп», – ҳәа иҳәеит Роберт Кьиут.
