Анаҩс иара имҩа хан Аахыҵ Уаԥстәыла Ахада Иусбарҭа ахь. Аԥсны Ахада иаара аҳаҭыр азы араҟа аҳаҭыртә карул арота ргылан.
Бадра Гәынба диԥылеит Аахыҵ Уаԥстәыла Ахада Алан Гаглоев.
Аиԥылараҿы аҳәынҭқаррақәа рхадацәа акыршықәсатәи аусеицура азҵаарақәа ирылацәажәеит.
Аҩ-ҳәынҭқаррак рхадацәа иара убас агәаларшәагатә ҳамҭақәа еимырдеит.
Аҳәынҭқарра Ахада зхадараҿы дыҟоу Аԥсны аделегациа иара убас Ареспублика Аахыҵ Уаԥстәыла 35-шықәса ахыҵра иазкны имҩаԥгаз апарад иаҭааит.
Ареспублика аԥҵара Амш — аҳәынҭқарратә ныҳәоуп. Уи есышықәса, цәыббрамза 20 рзы иазгәарҭоит.
