«Уажәы иарбоу араион аҿы аԥшаара-еиқәырхаратә усурақәа мҩаԥысуеит», - ҳәа адырра ҟарҵеит аиқәырхаратә хылаԥшырҭа аҿы.
Аиԥш-зеиԥшу арыцҳара ҟалеит Гаграгьы. Амшын анеисуаз ахаҵа амшын дагеит. Иҭахаз ихаҭара иахьа уажәраанӡа ишьақәыргылаӡам.
«Уи иԥсыбаҩ аӡы ирзамымхӡацт, избан акәзар уи аҟәара 150 метрак рҟынӡа иацәыхараны иҟоуп. Ацәқәырԥара ахьыӷәӷәоу инамаданы иҭахаз иԥсыбаҩ аӡы амхра макьаназы иауӡом», - ҳәа адырра ҟарҵоит апресс-маҵзура аҿы.
Аԥсны Иҷыдоу аҭагылазаашьақәа рзы Аминистрра аԥсшьаҩцәеи аҭыԥантәи ауааԥсыреи рхь ааԥхьара ҟанаҵоит ишәарҭоу аԥсабаратә ҭагылазаашьақәа инарымаданы амшын аҭалара аамҭала мап ацәыркырц, иара убас аҟәара азааигәарагьы ҷыдала агәҽанызаара аадырԥшларц.
