Аҳәынҭқарра Ахада иазгәеиҭеит атәыла аҳәынҭқарратә ныҳәа хада ҳажәлар рзы аҵак ду зламоу ала иреиҳаӡоу аҩаӡара аҭаны ишеиҿкаатәу.
Аҳәынҭқарра Ахада, атәыла Арбџьар мчқәа рыдҵаҟаҵаҩ хада Гәынба Бадра идҵала, цәыббрамза 30 рзы, Аҟәа ақалақь Аидгылара амҩаҟны Ахьӡ-Аԥша апарк аҿы ашәҭшьыҵәрақәа рышьҭаҵара анаҩс имҩаԥысуеит атәылахьчара Аминистрра аррамаҵзурауааи егьырҭ амчратә еилазаарақәеи злахәу аныҳәатә ныҟәара.
Аиааира амш ныҳәазы иаартхоит Аԥсны асахьаҭыхыҩцәа Реидгыла ацәыргақәҵатә зал, иара убас иазгәаҭоуп еиуеиԥшым аныҳәатә уснагӡатәқәа рымҩаԥгара.
Аныҳәатә усмҩаԥгатәқәа рзы Аԥсныҟа иаараны иҟоуп Урыстәыла, Аахыҵ Уаԥстәыла уҳәа егьырҭ атәылақәа рҟынтә асасцәа жәпакы.
Ақалақь ахада Агрба Ҭемыр атәыла Ахада адырра ииҭеит цәыббрамза 27 азы, Аҟәа ақалақь ахақәиҭтәра амш азы аныҳәатә программа шеиқәыршәоу.
Аҳәынҭқарра Ахада аԥыза-министр Владимир Делба адҵа ииҭеит аныҳәа иазку аусмҩаԥгатәқәа ирылахәу аусбарҭақәа рҽеимаданы русуразы аҭакԥхықәра аԥыза-аминистр иҳаҭыԥуаҩ Џьансыхә Нанба инапы ианиҵарц.
