Ԥхынҷкәынмза 19, 2024 шықәса, асааҭ  13:00 инарзынаԥшуа, Апарламент ахыбраҿы имҩаԥысуаз аекономикатә политикеи ареформақәеи аинформациатә технологиақәеи рзы Аилак аилатәара аҿы акриптовалиута амаининг арҳаразы амаругақәа рхархәара ақәиҭымтәра азы азакәан апроект алацәажәараан адепутатцәа Кан Кәарҷиеи Адгәыр Ҳаразиеи ирыбжьалаз ажәеимакра иахылҿиааз аиҿагылараан  Адгәыр Ҳаразиа имаз абџьар ихы иаирхәит, уи ԥшьынтә еиҵамкәа дхысит. Убри аан ихахәы ақәиаарҭа ахь, иара убас ижәҩахыр ахь ахәрақәа иоуит адепутат, Аԥсны жәлар Рџьынџьтәылатәи еибашьра аветеран, «Леон»  иорден акавалер,  «Агәымшәаразы» амедал занашьоу Кан Кәарҷиа, Аԥсны Жәлар Реизара-Апарламент адепутат, Аԥсны жәлар Рџьынџьтәылатәи еибашьра аветеран, «Агәымшәаразы» амедал занашьоу Вахтанги Голанӡиа игәахьы ахәра иоуит. Уи Ареспубликатә хәышәтәырҭахь днаган игәеисреи иԥсыԥлагаҩагареи ыҟамкәа (аклиникатә ԥсра аҭагылазаашьа). Иара иаразнак аԥсеиқәырхарҭа аҟәшахьы днаргеит, ареанимациатә усмҩаԥгатәқәа ирылагеит, аха рыцҳарас иҟалаз, урҭ лҵшәадахеит. Вахтанги Гәаланӡиа иԥсҭазаара далҵит. Уаанӡа зыԥшаара рылаҳәаз Адгәыр Ҳаразиа дааныркылеит рашәарамза 14, 2025 шықәса рзы. Рашәарамза 15, 2025 шықәса рзы Адгәыр Рафеҭ-иԥа Ареспублика Аԥсны ашьаусеиҿкаартә закәанԥҵара инақәыршәаны, Аԥсны Ашьаустә закәанеидкыла ахәҭаҷ 99 ахәҭа 2 апункт «е», ахәҭаҷ 29 ахәҭа 2 рыла иазԥхьагәаҭоу ацәгьоурақәа — гәҭакрала азеиԥшшәарҭаратә уаҩшьреи азеиԥшшәарҭаратә уаҩшьра аҽазышәареи, иара убас ахәҭаҷ  217, ахәҭа 1 иазԥхьагәанаҭо ацәгьоура – амцабџьари уи азы аџьаԥҳани изакәанымкәа аахәара, аҵәахра, аныҟәгара рзы ахара идҵан.