Ацентр ахықәкы хада – акультуратә усеицура арҿиареи, аҟазаратә ԥшьгамҭақәа, агуманитартә программақәа рыдгылара, Аԥсни Аладатәи Корееи рыбжьара аԥышәа аимдара, абри атәы аанацҳауеит Аԥсны акультура Аминистрра.

Ацентр аартра иазкыз аусмҩаԥгатә мҩаԥгахеит Ареспублика Кореиа Амилаҭтә Ассамблеиа ахыбраҿы.

Аусмҩаԥгатә алагамҭазы иадырҳәеит Ареспублика Аԥсны, Урыстәылатәи Афедерациа, Ареспублика Кореиа агимнқәа.

Ацентр аартра иадҳәалаз ацеремониа рхы аладырхәит Аԥсны акультура аминистр Даур Ақаҩба, Ареспублика Кореиа Амилаҭтә Ассамблеиа (Апарламент) адепутатцәа, аҟазара аусзуҩцәа, арҿиаратә интеллигенциа рхаҭарнакцәа, абизнес-еилазаара, аусдкылаҩцәа, ажурналистцәа.

Аусмҩаԥгатә аартуа адепутат Ан Хо Енг еизаз ацентр аартра рыдиныҳәалеит. Уи иқәгылараҿы атәылақәа рыбжьара акультуратәии аекономикатәи аимадарақәа рыҿиара иаҵоу аҵакы ахадара инаҵшьны иазгәеиҭеит.  

«Сгәы иаанагоит иахьа иааҳартуа Ацентр активла аимадаразы плошьадканы иҟалоит ҳәа», - иҳәеит Ан Хо Енг.

Аԥсны акультура аминистр Даур Ақаҩба иқәгылараҿы ацентр ҿыц аартра хықәкы хадас имоуп – Аԥсни Аладатәи Колреиеи рыбжьара акультуратә усеицура арҿиара, аԥышәеимадара, апроектқәеи агуманитартә аԥшьгарақәеи рыла аимадаразы аплошьадка аԥҵара, ҳәа инаҵшьны иазгәеиҭеит.  

«Ари ашьаҿа ажәларқәа рыбжьара аилибакаареи аиҩызареи рырӷәӷәара иацхраауа аагумнитартә усхкы аҿы апроектқәа реицынагӡара, хра злоу адиалог абжьаҵара азы иҿыцу аперспективақәа цәырнагоит», – ҳәа иҳәеит Даур Ақаҩба.

Ацентр аусура аҳәаақәа ирҭагӡаны иазԥхьагәаҭоуп Аладатәи Кореиа ауааԥсыра Аԥсны акультуратә ҭынха деилзыркаауа ацәыргақәҵақәа, аконцертқәа, уҳәа егьырҭ аусмҩаԥгатәқәа реиҿкаареи рымҩаԥгареи.