«Бзиала шәаабеит ҳәа шәасҳәоит. Ҳҳәынҭқаррақәа ирыбжьоу аизыҟазаашьақәа ҳәылауаа рыԥсҭазаашьа аиӷьтәра иазынархоу аицхырааразы алшара ҿыцқәа рыла ихарҭәаахо иалагеит. Ари зеиԥш хықәкны иҳамоуп.  

Гәахәароуп урыстәылатәи ҳколлегацәа, анагӡаратә мчреи азакәанԥҵаратә мчреи рҳәаақәа ирҭагӡаны ҳколлегацәа даара аԥхарра аҵаҵаны, хӡыӡаарала иахьазыҟоу абас аҵак ду змоу ҳаиашьаратә еизыҟазаашьақәа», — иҳәеит Бадра Гәынба.

Урыстәыла Аҳәынҭқарратә Дума Ахантәаҩы ихаҭыԥуаҩ Владислав Даванков иаҵшьны иҳәеит апарламентбжьаратә усеицура ашьақәыргылара иамоу аҵак ду атәы. Уи Аԥсны Ахада Урыстәыла Аҳәынҭқарратә Дума Ахантәаҩы  Виачеслав Володини, афракциа «Ауаа ҿыцқәа» анапхгаҩы   Алексеи Нечаеви рҟынтәи салам ииҭеит.

«Аԥсны сара даара исзааигәоу республикоуп, лассы-лассы саҭаалоит. Ҳпартиа аԥыза апарламентбжьаратә еизыҟазаашьақәа шьақәыргылалатәуп ҳәа адҵа ҳаиҭеит. Ҳазлацәажәаша атемақәа есқьынгьы ирацәаны иҳамоуп, урҭ имаҷуи ибжьаратәуи анаплакрақәа рырҿиарагьы иадҳәалоуп. Апартиақәа аиҩызара рыбжьазар, аԥышәа еимырдалар бзиоуп, избан акәзар уи аидеиа ҿыцқәа, ажәалагала ҿыцқәа реимдара алнаршоит», — иҳәеит Владислав Даванков.

Урыстәыла Аҳәынҭқарратә Дума Ахантәаҩы ихаҭыԥуаҩ Владислав Даванков напхгара ззиуаз Аҳәынҭқарратә Дума аделегациа Аԥсныҟа иааит апартиа «Аԥсны жәлар рыфронт»  анапхгара иҟанаҵаз ааԥхьарала.

Урыстәылатәи  апарламентарии уаҵәы ҳаҭыр зқәу асасцәа раҳасабала Аԥсны жәлар рыфронт аизара ду аусура рҽаладырхәуеит.