Аҟәа. Жьҭаарамза 29, 2025 шықәса. Аԥсныпресс. Аԥсныҟа иааит ззанааҭ хырхарҭала еиуеиԥшым Урыстәыла Иҷыдоу аҭагылазаашьақәа рзы Аминистрра аусзуҩцәа ргәыԥ.
Урыстәылатәи аиқәырхаҩцәа раара хықәкы хаданы иҟоуп – аԥснытәи рколлегацәа изаамҭанытәиу апроблемақәа рыӡбараҿы ацхыраара рыҭара, аусура аҩаӡара ашьҭыхразы аԥхьанатә иҟаҵатәу ауснагӡатәқәа ралкаареи атехникатә еиқәыршәареи иҷыдоу аҭагылазаашьақәа рцәырҵраан ареспублика ауааԥсыра рыхьчара иазку ауснагӡатәқәа рынагӡара аҿы иҿыцу азнеишьақәа ралкаареи рганахьала адгылара рыҭара, ҳәа адырра ҟанаҵоит Аԥсны Иҷыдоу аҭагылазаашьақәа рзы Аминистрра апресс-маҵзура.
Аусуратә амчыбжь зегьы иалагӡаны урыстәылатәи аспециалистцәа Аԥсны Иҷыдоу аҭагылазаашьақәа рзы Аминистрра араионтә ҟәшеиҵақәа зегьы рҿы аус рулоит, аԥснытәи рколлегацәа русура аҷыдарақәас иаҵоу еилыркаауеит, аҟәшеиҵақәа хазы-хазы рҭаххрақәа еилыркаауеит.
Иарбоу аҭаара аихшьаалақәа рыла, Урыстәылеи Аԥсни Иҷыдоу аҭагылазаашьақәа рзы Аминистррақәа еицынарыгӡараны иҟоу ауснагӡатәқәа рыплан шьақәыргылахоит. Урыстәыла аиқәырхаратә хылаԥшырҭа аусзуҩцәа ргәыԥ Аԥсныҟа аара азы аӡбамҭа рыдыркылеит Москва имҩаԥысыз аминистрцәа Алеқсандр Куренкови Лев Кәыҵниеи реиԥылара аихшьаалақәа рыла.
