Аҟәа ақалақь ахада ихаҭыԥуаҩ Авҭандил Сурманиӡе зхадараҿы дыҟоу акомиссиа агәараҭақәа рсанитартә ҭагылазаашьа, реиқәыршәазаара, реиҿкаашьа, рыриаҵәара, рырԥшӡара, ашәҭқәеи аҵиаақәеи рырацәара, ауааԥсыра асеиԥш аиҿкаашьа рҽалархәра, уҳәа ахьынӡазаларшоу гәарҭон. Аконкурс ахь иалаҵан азыҳәамҭақәа 15.

Аконкурс аихшьаалақәа рыла аиааира агеит  Цәыббрамза 30 амҩаҿы игылоу аҩны №8 ашҭа. Уи «Иреиӷьу аҟәатәи ашҭа-2025» ҳәа ахьӡ аиуит. Ари ашҭа 2026 шықәсазы аиқәыршәазаара аплан иалаҵахоит. Иара убас иалкаахеит Агрба имҩала игылоу аҩнеихагыла № 8; Семерџьиев имҩала игылоу аҩнеихагыла №142; Аршба имҩала игылоу аҩнеихагыла № 25 ашҭақәагьы. Араҟа инхо ауааԥсыра аиқәыршәазаара иадҳәалоу аусмҩаԥгатәқәа активла рхы аладырхәуан.

Авҭандил Сурманиӡе аицлабра зхы алазырхәыз зегьы иҭабуп ҳәа раҳәо адырра риҭеит урҭ зегьы доусы рышҭақәа рыриаҵәаразы аиҭаҳатәқәа рыла ишеиқәыршәахо.