Аҟәа. Жьҭаарамза 12, 2022 шықәса. Аԥсныпресс. Аҳәынҭқарра Ахада Аслан Бжьаниа абизнес -уаажәларра ахаҭарнакцәа алархәны аилацәажәара мҩаԥигеит
Аиԥылара аартуа, Аҳәынҭқарра Ахада анаплакҩцәа иҭабуп ҳәа реиҳәеит аамҭа уадаҩ ҳанҭагылоу аамҭазы атәылазы еснагь иҟарҵо ацхырааразы.
«Аҿкычымазара аан иҟашәҵаз ацхыраара ахә ҳаракны иаҳшьоит. Шәара ацхыраара рышәҭоит зсоциалтә ҭагылазаашьа хьысҳау. Шәрыцхраауеит аспортсменцәа, артистцәа, абаҩхатәра злоу ауаа. Атәыла аҧсҭазаара ахырхарҭақәа зегьы активла шәрылахәуп. Иахьагьы шәазхиоуп атәыла ашәарҭадара арӷәӷәара адгылара аҭара. Шәара иҟашәҵо иаанарԥшуеит иҵаулоу апатриотизмра",- ҳәа иҳәеит Аҳәынҭқарра Ахада.
Анаплакқәа рхаҭарнакцәа азыӡырҩит Аҧыза-министр ихаҭыҧуаҩ, атәылаҿы амобилизациатә зыҟаҵара аиӷьтәразы аусуратә гәыҧ анапхгаҩы Сергеи Пустовалов иажәахә. Аԥыза-министр далацәажәеит имҩаԥгоу аусурақәа ртәы, ҷыдала, дазааҭгылеит ҳазҭагылоу аамҭазы ар атехникатә мыругақәа рыла реиқәыршәара азҵаара. "Аусуратә гәыԥ иацнаҵоит иазыԥҵәоу аҿҳәара инақәыршәаны Аԥсны Аҳәынҭқарраҟны амобилизациатә зыҟаҵара иазку атәыла анапхгара аконцептуалтә жәалагалақәа рыдгалара», - ҳәа иҳәеит иара.
Анаплакҩцәа иазгәарҭеит арбџьар мчқәа ирыгу-ирыбзоу аус аҟны еснагь адгылара аарҧшра ишазхиоу. «Уԥсадгьыли ууажәлари рыдгылара - дарбанзаалак атәылауаҩ иуалуп», - ҳәа иазгәеиҭеит «Аԥсны аҩқәеи аӡқәеи» реилазаара адиректор хада Николаи Ачба.
«Иҟоу убри аҩыза аԥышәа аҳәынҭқарра ацхыраара аус аҟны, иаҳҳәап Ковид - 19 еиԥш иҟоу иаҿагыланы ақәԥараҟнеиҧш. Убри шьаҭас иҟаҵаны, абизнес уаажәларреи аҳәынҭқарреи реимадара аус ауеит. Ҳара иаҳуалуп ҳәа иҳаԥхьаӡоит аган ҳавамгылакәа, аҳәынҭқарратә ԥсҭазаара аҽалархәра», - ҳәа иҳәеит анаплакҩы.
Аиԥылара хыркәшо, Аҳәынҭқарра Ахада даҽазнакгьы анаплакҩцәа иҭабуп ҳәа реиҳәеит иҟарҵо ацхырааразы, абизнес уаажәларра ар ирнаҭо адгылара ауаажәларра рзы аҵак ду амоуп.
Аиԥылара иалахәын аԥыза-министр Алеқсандр Анқәаб, Ахада Иусбарҭа Анапхгаҩы Џьансыхә Нанба, Апарламент Аиҳабы Лаша Ашәба, Ашәарҭадара Амаҵзура амаӡаныҟәгаҩ Сергеи Шамба, аԥыза-министрцәа Беслан Џьопуа, Сергеи Пустовалов, Кристина Озган, Владимир Делба, аҩныҵҟатәи аусқәа рминистр Вальтер Быҭәба, атәылахьчара аминистр Владимир Ануа, ашәахтәқәеи аизгатәқәеи рминистр Михаил Габелиа, атуризм аминистр Ҭемраз Хышба, Ашәарҭадара Амаҵзура ахантәаҩы Роберт Киут, апрокурор хада ихаҭыԥуаҩ Дамир Кәыҵниа, Аҳәынҭқарратә ҳазалхратә еилакы ахантәаҩы Оҭар Хьециа, Аԥсны абизнес-уаажәларра ахаҭарнакцәа.
