Аҳәаахьчаратә маҵзура аамҭақәа зегьы раан ахамеигӡареи, аҭакԥхықәреи, агәымшәареи ирсимволын. Аҳәаахьчаҩцәа роуп раԥхьа иарбанзаалак ашәарҭарақәа хацәнмырха ирԥыло, раԥхьа аҳәынҭқарра ашәарҭадара ахьчаразы игыло. Афырхаҵара, алеишәа, ахачҳара, аҭакԥхықәра дуӡӡа зҭаху ари амиссиа знапы иану— шәара есҽны шәыдгьыл ахьчара шәшазхиоу шьақәшәырӷәӷәоит.

Аԥсны Аҳәынҭқарратә шәарҭадара Аҳәаахьчаратә усбарҭа аҭоурых — ари Аԥсадгьыл абзиабареи, ахачҳара дуи, ахамеигӡареи ртәы зҳәо ҭоурыхуп. Раԥхьатәи аҳәаахьчаратә отриад аԥҵан Ҳаԥсадгьыл зҭагылаз аамҭа хьанҭақәа раан, алахьынҵа аӡбара анымҩаԥысуаз, 1992 шықәса абҵарамза 20 рзы Аԥсны Аџьынџьтәылатә еибашьра ашыкьымҭазы ҳмилаҭтә ԥхьагылаҩ Владислав Арӡынба изыӡбала.

Шәара Аԥсны Аҳәынҭқарра асуверенитет ашьақәырӷәӷәараҟны, аҳәаақәа рыхьчараҟны шәлагаламҭа аҳаҭыр ду иаԥсоуп.  

Ҷыдала иҭабуп ҳәа шәасҳәарц сҭахуп аҳәаахьчаратә маҵзура аветеранцәа. Хәы змам урҭ рԥышәа, Аԥсадгьыл разыҟазаашьа иахьа аҳәаахьчаҩцәа рабиԥара ҿыцқәа зықәныҟәо атрадициақәа шьаҭас ирымоуп.

Иахьа шәара хьыӡла-ԥшал, азаанаҭдыррала шәҿаԥхьа иқәгылоу ауснагӡатәқәа рынагӡара шәаҿуп, Аԥсны жәлар шәара шәазыҟаҵара, шәпатриотизм, хамеигӡарада имҩаԥыжәго Аԥсадгьыл амаҵзура агәра ргоит.

Гәык-ԥсык ала ишәыдысныҳәалоит агәабзиара, ахирра, аихьӡарақәа инашәыгӡо амаҵзураҟны. Ирыгымзааит шәыҩнаҭақәа еснагь аҭынчра, аԥхарра, аҳәоуеиқәшәара».