Асоциал-культуратә проектқәа Рцентр «Аҵла» адиректор, афестиваль аиҿкааҩ Светлана Габуниа иҟалҵаз адыррақәа рыла, афестиваль амҩаԥгарахь иадыԥхьалахеит 300-ҩык инарзынаԥшуа ауаа, аволонтиорцәа, акондитерцәа, акреативтә усхкы ахаҭарнакцәа, аҭыԥантәи ауааԥсыра, аҭыжьыҩцәа, асасааирҭатәи ақьафурҭатәи абизнес аусзуҩцәа.
Афестиваль анапхгараҭара алахәыла Сариа Аргәын ари ахҭыс ахықәкы хаданы иҟоуп аԥсуа культуреи атрадициақәеи ибеиоу аҭоурыхтә ҭынхеи рпопулиаризациа ҳәа иазгәалҭеит.
Аусмҩаԥгатә асасцәа алшара рымоуп аԥсуа сасдкылара азы еиҳа ирацәаны адыррақәа раиура, итрадициатәу амилаҭтә маҭәақәа рбареи амилаҭтә чысқәа ргьамақәа рбареи, анышь сахьа змоу ачашә дуӡӡақәеи иԥхоу арыжәтәқәеи аҵәы иахаҵаны иӡу акамбашьжьи уахь иналаҵаны.
Аӡынтәи афестиваль «Амандарин» мҩаԥысуеит ажьырныҳәамза 6 инаркны 10 нӡа. Уи еиҿкаауп Урыстәылатәи Афедерациа Ахада игрантқәа Рфонди Ареспублика Аԥсны атуризм Аминистрреи иҟарҵаз адгылара иабзоураны. Аинформациатә дгылара еиқәнаршәоит атуризм Аминистрра, аҿари аспорти русқәа рзы Аҳәынҭқарратә Еилакы, иара убас Адунеизегьтәи аԥсуа-база жәлар Рконгресс.
