«В.Г. Арӡынба ихьӡ зху Аҟәатәи жәларбжьаратәи аҳаирбаӷәаза аиҭашьақәыргылара иалнаршеит зымҽхак ҭбаау аԥсуа-аурыс инвестициатә проект анагӡара». - иҳәеит Аҳәынҭқарра Ахада Бадра Гәынба, I Жәларбжьаратәи аекономикатә форум аартраан дықәгыло.

Аҳаирбаӷәаза анаадырт инаркны 121 нызқьҩык инареиҳаны апассаџьырцәа рымаҵ ауит. Иааиԥмырҟьаӡакәа аҳаиртә еимадара рыбжьоуп Аԥсны аҳҭнықалақьи Москвеи, Санкт-Петербурги, Нижни Новгороди, Ханты-Мансиски.

«Ҳара активла аус адаҳулоит амаршруттә ҳа арҭбаара. Аус рыдырулоит ахырхарҭа ҿыцқәа, Псков, Уфа, Самара, Казань, Оренбург, Екатеринбург, Тиумен, Пермь, Нальчик уҳәа», – ҳәа азгәеиҭеит Гәынба.

Жәларбжьаратәи аҳаиртә еимадара аусура аларгара ареспублика иаҭаауа асасцәа рхыԥхьаӡара еизнарҳауеит, Аԥсны мрагыларатәи араионқәа рҿы аекономика аизырҳара иацхраауа факторны иҟоуп.

Аԥсны аҿаԥхьа иқәгылоу ахыдҵақәа ируакуп адәныҟахәаахәҭратә баланс аиҟаратәра.

«Иахьа аҳәааҭыгара ахәҭа 13% ыҟоуп, аҳәааҭагалара – 87%.

Аԥсны аҳәынҭқарразы ихадоу хәаахәҭратә лахәылаҩны иҟоуп Урыстәылатәи Афедерациа, уи Аԥсны адәныҟатәи ахәаахәҭраҿы амҽхак ду ааннакылоит. Ари иаҳәо рацәоуп», – иҳәеит аҳәынҭқарра Ахада Бадра Гәынба.