Аиԥылара аартуа, акомиссиа ахантәаҩы, аԥыза-министр ихаҭыԥуаҩ Џьансыхә Нанба инаҵшьны иазгәеиҭеит Аҳәынҭқарра Ахада иусԥҟа анагӡара аҳәаақәа ирҭагӡаны аусура шымҩаԥысуа.
Акомиссиа уаанӡа адокументқәеи аилыркаарақәеи згызр абизнес-аԥшьгарақәа ирыхәаԥшит. Аекономика аминистрра ишьақәырӷәӷәоу апрограмма ашәага-загақәа инагӡаны ирықәшәо апроектқәа рсиа азнархиеит.
Аилатәара алахәылацәа аҿҳәара иалацәажәеит, ишьақәдырӷәӷәеит.
Иазхьаԥшит аҳәынҭпрограмма анагӡараан ицәырҵуа административтәи аиҿкааратәи зҵаарақәа.
Џьансыхә Нанба иколлегацәа рахь ааԥхьара ҟаиҵеит русура дырласырц азы:
«Даара акраҵанакуеит ҳкомиссиа аусура арццакра. Иааиуа аматериалқәа ирласны ҳрыхәаԥшлароуп ҳазҭоу ашықәс азы иахьынӡаҳалшо азыҳәақәа рықәшаҳаҭхара ҳахьӡарц, аекономика аминистррахь инагоу ажәалагалақәа рзы аӡбамҭақәа ҳадаҳкыларц», - иҳәеит Нанба.
Имаҷуи ибжьаратәуи анаплакқәа адгылара рыҭаразы аҳәынҭпрограмма шьақәырӷәӷәан 2025 шықәса абҵарамза 17 рзы, Аԥсны Ахада иусԥҟала. Уи «2026-2030 шықәсқәа рызтәи Аԥсны Аҳәынҭқарра асоциал-економикатә ҿиара Аҳәынҭқарратә программа» аҟны акрызҵазкуа хәҭаны иҟоуп.
Апроект ахықәкы хадақәа:
абизнес маҷи абжьаратә бизнеси рзы иманшәалоу аҭагылазаашьақәа раԥҵара;
ареспубликаҿы аинвестициатә программақәа рыҿиаразы аҭагылазаарашьа аԥҵара;
ахатәы сектор аҿы аусурҭатә ҭыԥқәа рхыԥхьаӡара аизҳара;.
Аԥсны атуристтә лшара хра аманы анагӡара.
