Аҟәа. Мшаԥымза 20, 2023 шықәса. Аԥсныпресс /Тамара Ачба/. Аҭоурыхтә дәы «Лыхнашҭа» игылоу, шәышықәсеи бжаки зхыҵуа кавказтәи аҭәаҵла китаитәи амаҭәашьар ала ирхәышәтәуеит. Уи зны Китаинтәи Москваҟа иааргеит, анаҩс уаантәи Аҟәаҟа.
Аекологиа азы Аҳәынҭқарратә еилакы ахантәаҩы Савели Ҷыҭанаа Аԥсныпресс акорреспондент диҿцәажәо Китаинтәи ҷыдала иаагаз ахәшәи, уи иадҳәаланы аҵла аиқәырхара аганахьала иҟоу агәыӷрақәеи дрылдацәажәеит.
«Ари даара иҽеим ахҭыс аныҟала, аҵла аиқәырхара азы рыцхыраара ҳадыргалеит Аԥсны аамҭала инхо, арԥхарҭақәа рҿы ауаҭраҭыхқәа рааӡара знапы алаку акитаицәа. Урҭ ас еиԥш ааха зауз аҵлақәа Китаи еиқәдырхоит иҷыдоу амаҭәашьар ала ҳәа агәра ҳдыргеит. Анаҩс ишеилкаахаз ала, уаҟа иҟоуп иарбоу амаҭәашьар аус адулара мҩаԥызго Аинститут. Акитаицәа иара аҿарҵеит, Москваҟа иааргартә еиԥш иҟарҵеит, уаантәи ҳара иаҳдыруаз џьоукы рыла Аԥсныҟа иааҳгеит», -ҳәа иҳәеит Савели Ҷыҭанаа.
Иҳаҩсыз амҽышазы Аԥсныҟа иааган 1 литрак-литрак зкуа 30 инарзынаԥшуа акәаԥлашьҭыгақәа.
«Аспециалистцәа рыла аҵла ашьапы аҿы акылҵәарақәа ҟаҵаны ҷыдала уи иазку агәырқәа рыла 30 акәаԥлашьҭыгақәа ирҭоу ахәшә аҵиаа иалалартә иҟаҵоуп. Ари амаҭәашьар мчыбжьык иазхаша ыҟоуп. Иааиуа амчыбжь азы ҳара иарбоу ахәшәтәратә процедура еиҭанаҳагӡоит, анаҩс хра злоу алҵшәақәа ҳарзыԥшлоит», - ҳәа иазгәеиҭеит аеколог.
Мшаԥымза 5, ахәылбыҽха, зхаҭара шьақәыргыламыз џьоукы абензинхәархь ала аҵла ашьапы ааха арҭеит. Аԥҟарсҭа –15 – 20 см. рҟынӡа инаӡон.
Мшаԥымза 11 рзы ацәгьоура аҿы игәҩароуп ҳәа иаанкылан аишьцәа Ираклии Даури Багаҭелиаа.
