Аҟәа. Мшаԥымза 28, 2023 шықәса. Аԥсныпресс. Аҩныҵҟатәи аусқәа рминистр Вальтер Баҭәба аԥшьаша, мшаԥымза 27 рзы «2023-2025шш. амҩатә ԥҟарақәа реилагара автоматтә фиксациа асистема аҿиара» азы ахылаԥшратә хықәкытә программа ишьақәнарӷәӷәаз апрограмматә усмҩаԥгатәқәа рынагӡара азы анапхгарабжьаратәи акомиссиа аилатәара мҩаԥигеит.
Аилатәара рхы аладырхәит афинансқәа рминистр ихаҭыԥуаҩ Саид Гәыбаз, Аҳәынҭқарра Ахада Иусбарҭа аекономика аҟәша анапхгаҩы инапынҵақәа назыгӡо Алмасхан Аӡынба, аҩныҵҟатәи аусқәа Рминистрра ахаҭарнакцәа. Акомиссиа аилазаара иалоуп иара убас Апарламент адепутатцәа.
Аиԥылара иалахәыз амҩа-транспорттә шәарҭадара ашьҭыхреи уахи-ҽни иааиԥмырҟьаӡакәа ареспублика амҩақәа рҿы иҟоу аҭагылазаашьа амониторинг амҩаԥгареи хықәкы хадас измоу апрограмма апараметрқәа ирылацәажәеит.
Апрограмма афинанстәра 2023 шықәсазы 40 млн. мааҭ рҟынӡа иазԥхьагәаҭоуп, 2024 ш. - 80 млн. мааҭ, 2025 ш. - 30 млн. мааҭ.
Вальтер Быҭәба акомиссиа алахәылацәа зегьы рыбжьара аусеицура иаҵоу аҵакы ахадара азгәеиҭеит. Анаҩстәи аилатәара лаҵарамза 4 рзы имҩаԥысроуп.
