Аҟәа. Лаҵарамза 3, 2023 шықәса. Аԥсныпресс. Лаҵарамза 30 инаркны рашәарамза 2 аҟынӡа Аԥсны имҩаԥыслоит Аахыҵ Уаԥстәыла акультура Амшқәа, ҳәа адырра ҟанаҵоит Аԥсны акультура Аминистрра апресс-маҵзура.
Аахыҵ Уаԥстәыла акультура Амшқәа раартра аныҳәатә церемониа мҩаԥгахоит лаҵарамза 31 рзы. Самсон Ҷанба ихьӡ зху Аԥснытәи аҳәынҭқарратә драматә театр аҿы Аахыҵ Уаԥстәыла акультура амшқәа актәи амш азы К. Хетагуров ихьӡ зху Аахыҵ Уаԥстәыла Аҳәынҭқарратә драматә театр ахәаԥшцәа иднарбоит адраматург Геор Хугаев еихьӡылоу иажәамаана ала иқәыргылоу аспектакль «Ауапа еиқәаҵәа». Ахәаԥшцәа ирызнагахоит гәыкала азыҟазаареи ачарҳәареи абзиабареи ауалԥшьа анагӡареи ирызку аҭоурых. Артистцәа ауаа ртипажқәа аазырԥшуа аԥстәқәа рыԥшра рыманы иқәгылоит.
Аспектакль мҩаԥгахоит асааҭ 18:00 рзы. Аҩналара хәыда-ԥсадоуп.
Рашәарамза 1 азы Р.Гәымба ихьӡ зху аҳәынҭқарратә филармониа аҿы иқәгылоит Борис Галаев ихьӡ зху Аахыҵ Уаԥстәыла Аҳәынҭқарратә ансамбль «Симд». Уи сынтәа Аахыҵ Уаԥстәыла Ареспублика Аҳәынҭқарратә ансамбль ҳәа ахьӡ ахҵара 85-шықәса аҵра азгәанаҭоит.
Аконцерт мҩаԥгахоит асааҭ 18:00 рзы. Аҩналара хәыда-ԥсадоуп.
Аԥсны акультура аминистр Даур Ақаҩба, ас еиԥш аиҭныԥсахларатә усмҩаԥгатәқәа аиашьаратә жәларқәа рытрадициақәа, рҭоурых, ркультура атәы еиҳа еиӷьны адырра азы хра злоу алшара аԥнаҵоит, ҳәа иазгәеиҭеит.
«Акультура Амшқәа рымҩаԥгара – агуманитартә диалог аҳәаақәа рырҭбаареи аҭынчра арӷәӷәареи рзы акыр зҵазкуа шьаҿоуп», - ҳәа инаҵшьны иазгәеиҭеит Даур Ақаҩба.
