Жәларбжьаратәи аизыҟазаашьақәа рҿы акризистә цәырҵрақәа еиҳа-еиҳа ирыцлоит. Аколлективтә Мраҭашәара жәларбжьаратәи ашәарҭадара асистема арбгоит, исуверенттәу аҳәынҭқаррақәа рыҩныҵҟатәи аусқәа ӷәӷәала рыҽрыланагалоит, иара убри ала ахаос шьақәнаргылоит, иҿыцу аиҿагыларақәа зырбыжкуа аҭагылазаашьақәа аԥнаҵоит. Аха хырхарҭакла ишьақәгылоу адунеи аамҭа ацара иаҿуп, иахьа, аглобалтә-уаажәларратә еиҭакрақәа аҭыԥ анрымоу аамҭазы, апарламентаризм аинститут арӷәӷәара азҵаара даҽа аамҭак еиԥшымкәа актуалра аныԥшуеит.  

Урыстәылеи Аԥсни рзакәанԥҵаҩцәа аусеицура  аҳәаақәа рырҭбаара иазкны рҽазышәарақәа ирзеиԥшу аинтересқәа, атрадициақәа, акультурақәа рыдагьы, апарламентбжьаратәи адиалог инагӡаны ҳҳәынҭқаррақәа рмилаҭтә интересқәа ишрықәшәо гәыкала агәрагарагьы иадҳәалоуп.  

Урыстәылатәи Афедерациа Афедералтә Еизара Афедерациа Ахеилак аҿы аринахысгьы Аԥсны Жәлар Реизара-Апарламенти иареи Урыстәылеи Аԥсни рҿаԥхьа иӡбатәны иқәгылоу аҩганктәи актуалра злоу жәларбжьаратәи азҵаарақәа рыӡбара алзыршо,  зыҩаӡара ҳараку аусеицура шрыбжьало азы агәра ганы иҟоуп.

Ҳаҭыр зқәу Лаша Ныгәзар-иԥа! Шәара аԥхьа шәнаргыланы, Аԥсны Жәлар Реизара-Апарламент адепутатцәа зегьи гәыкала ишәзеиӷьасшьоит аизҳазыӷьареи аманшәалареи, шәнапы злаку аҭакԥхықәра зцу азакәанԥҵаратә аусура аҿы аихьӡара дуқәеи».