Аҟәа. Цәыббрамза 7, 2023 шықәса. Аԥсныпресс. Анапылампыласратә команда «Аԥсны» Расул Гамзатов диижьҭеи 100-шықәса аҵра иазку Урыстәылазегьтәи атурнир «Аиҩызара Ахраҿа» рхы аладырхәуеит, ҳәа адырра ҟанаҵоит аҿари аспорти русқәа рзы аҳәынҭқарратә Еилакы.
Атурнир Каспииск ақалақь Али Алиев ихьӡ зху аспорт Ахан аҿы имҩаԥысуеит. Уи рхы аладырхәуеит акомандақәа: «Ростов-Волеи» (ақ.Ростов-на-Дону), «Дагестан» (ақ.Махачкала), «Текстильщик» (ақ.Иваново), «Аԥсны» (Ареспублика Аԥсны), «Грозный» (ақ.Грозныи), «Динамо-МГТУ» (ақ.Маиҟәап).
Акомандақәа зегьы Урыстәыла ачемпионат Иреиҳаӡоу алига «Б» алахәылацәа роуп.
Цәыббрамза 7 рзы ҳара ҳкоманда акоманда «Грозныи» аспортсменцәа ирацлабраны иҟоуп, цәыббрамза 8 рзы аԥснытәи аспортсменцәа маиҟәаптәи акоманда «Динамо-МГТУ» аспортсменцәа ирԥылоит, ахәмаррақәа ралагалара аамҭа – асааҭ 16:00 рзы. Цәыббрамза 9 рзы имҩаԥгахоит афиналбжатә хәмаррақәа, цәыббрамза 10 рзы - афиналтә хәмаррақәа мҩаԥгахоит.
