Жьҭаарамза 16 рзы имҩаԥгаз реидк ала зынӡа иаанкылан ԥшьҩык амашьынарныҟәцаҩцәа,   ҩыџьа арыжәтә ыжәны иҟаз, ҩыџьа – анаркотикатә маҭәашьар зыдкылаз.

Зынӡа Аҳәынҭинспекциа, Ашьаусԥшааратә Усбарҭа,  Анаркотикқәа реикәыршареи рхылаԥшреи рзы Аусбарҭа аусзуҩцәа  еицхырааны имҩаԥыргаз апрофилактикатә усмҩаԥгатәқәа ирылҵшәаны иаанкылахеит 110 –ҩык амҩатә ԥҟарақәа еилазгаз ахаҿқәа. Аиҳарак еиларго аԥҟарақәа иреиуоуп: амҩатә ласра, амҩатә дыргақәа лахь рыҭара, асветофор арбагақәа рызхьамԥшра, атранспорт хархәага амҩаҿ иаҭыԥымкәа аргылара, аԥхьатә саркьақәа рырхәашьра, аԥгаламҩа анылара.

Аӡынтәи аамҭахәҭа ааигәахареи  амш агхареи инарымаданы, Аҳәынҭинспекциа аусзуҩцәа автомашьынатә саркьақәа рыԥшшәахәыркра анормақәа еилазго атранспорттә хархагақәа оперативла азхьаԥшра арҭаларц адҵа рыҭоуп.

Аҳәынҭинспекциа Аусбарҭа амашьынарныҟәцаҩцәа иргәаланаршәоит ареспублика аҿы амашьына аԥхьатәи асаркьақәа рыԥшшәахыркра азы азин шыҟам.

Иара убас амилициа аусзуҩцәа амашьынарныҟәцаҩцәа ргәырҽанырҵоит ашәарҭадара амаҟақәа рхарахәара ахымԥадатәра азы. Астатистика ишышьақәнарӷәӷәо ала, амҩатә машәырқәа раан урҭ ауаа рыԥсҭазаара еиқәнархоит.  

Ашәарҭадара амаҟақәа рнаҩс Аҳәынҭусбарҭа аусзуҩцәа ахәыҷтәы креслақәа рхархәаразы активла адгалара ҟарҵоит.  Ахәыҷтәы кресла амҩатә машәырқәа раан ахәыҷқәа рыԥсҭазаара аиқәырхареи ааха аиура рацәыхьчареи акыр иацхраауеит.

Автомашьына  анцо аамҭазы ахәыҷқәа анапаҿы рыкра ҟалаӡом, иҟалаӡом иара убас урҭ аԥхьатәи атәарҭақәа рҿы рыртәара.

Атәыла аҩныҵҟатәи аусқәа Рминистрра анапхгарала ирӷәӷәоу ареидтә усмҩаԥгатәқәа рымҩаԥгара ацҵахоит. Апрофилактикатә усмҩаԥгатәқәа рымҩаԥгара ахықәы хаданы иҟоуп амҩатә машәырқәа рхыԥхьаӡара аиҵатәра, амҩатә ԥҟарақәа реилагара армаҷра.