Аҟәа. Ажьырныҳәамза 22, 2024 шықәса. Аԥсныпресс. «Аамҭа кьаҿ иалагӡаны Аҟәаҟа амҩа иқәлараны иҟоуп Урыстәыла акультура Аминистрра аусдырыҩцәа. Аминистрра аделегациа иалахәхоит И.Е. Грабарь ихьӡ зху Урыстәылазегьтәи асахьаҭыхра ҭҵаарадырра-реставрациатә Центр ахаҭарнакцәа, Аҳәынҭқарратә ҭҵаарадырра-реставрациатә Институт, Третиаков ихьӡ зху агалереиа, Аурыс музеи рхаҭарнакцәа», – ҳәа л-telegram-канал аҿы илыҩит Урыстәыла акультура аминистр Ольга Лиубимова.
Аспециалистцәа аҭыԥаҿы абылра иацәынхаз аҭыхымҭақәеи адокументқәеи рҭагылазаашьа ҭырҵаауеит, ареставрациатә усурақәа рыплан еиҿыркаауеит.
Амҽыша, ажьырныҳәамза 21 ауха, Аԥсны асахьаҭыхыҩцәа Реидгыла Ацәыргақәҵатә Зал Хада аҟны абылра ҟалеит.
Ахыбра аҩбатәи аихагылараҿы ишьҭан Амилаҭтә сахьатә галереиа афонд аҟынтәи – 4 000 инарзынаԥшуа асахьақәа. Урҭ маҷк ада зегьы блит. Мацара 200 сахьа заҵәык роуп еиқәхаз.
