Ааԥхьара аҟаҵара аҭоурых-культуратә ҵакырақәа, акомплексқәа, ансамбльқәа, аргыларақәа, амаҭәарқәа  реиқәырхареи, иара убас Аԥсны жәлар рмазараны иҟоу амилаҭтә мазара шьаҭас иамоу акультуратә ҭынха аԥхасҭахара, ахырбгалара, аимҵәара, ақәхра, уҳәа ааха азҭо егьырҭ ауснагӡатәқәа рыԥхьырҟәҟәаара хықәкыс иамоуп.

Адепутатцәа аилатәара аихшьаалақәа рышьаҭала еицҿакны «Аҟәа ақалақь аҿы Ацәыргақәҵатә зал Хада абылра иахҟьаны Амилаҭтә сахьатә галереиа афонд ацәыӡра азы» аҳәамҭа рыдыркылеит.

Аҳәамҭа атекст аҿы ахәҭакахьала иазгәаҭоуп:  

«Жәлар Реизара-Апарламент адепутатцәа ажьырныҳәамза 21, 2024 шықәса ашьыжь шаанӡа Аҟәа ақалақь, аҩны № 31 аҿы иҟоу Ацәыргақәҵатә зал Хада абылра ахҟьаԥҟьақәа гәалсра дула ирыдырылеит.

Амилаҭтә сахьатә галереиа афонд злашьақәгылаз асахьаркыратә рҿиамҭақәа рбылра ҳҳәынҭқарра акультуратә ҭынха азы ахаангьы зеиҭашьақәыргылара алымшо, акала иузхамырҭәаауа цәыӡ дуны иҟалеит.

Аԥснытәи асахьатә галереиа аԥҵара рхы аладырхәуан ареспублика аҿы еицырдыруа асахьаҭыхыҩцәа аӡәырҩы.  Уи хәажәкырамза, 1964 шықәсазы иаатит. Иара афонд аҿы иҟан  4 000 инареиҳаны аусумҭа шьахәқәа, урҭ рхыԥхьаӡараҿы иҟан раԥхьатәи апрофессионалтә апсуа сахьаҭыхыҩ А.К.Чачба-Шервашиӡе ирҿиамҭақәагьы. Агалереиа иара убас ихарҭәаахон асахьаҭыхыҩцәа, аҟазара абзиабаҩцәа, аҟазара аԥҵамҭақәа рколлекционерцәа хаҭала иҟарҵоз аҳамҭақәа рыла,   урҭ реиҳарак ҳтәыла аҳоурых абаҟақәаны иҟан.

Жәлар Реизара-Апаламент адепутатцәа Амилаҭтә сахьатә галереиа афонд арҿиамҭақәа рбылра акультуразы харҭәаашьа змам акакәны иҟоуп ҳәа иазгәарҭеит. Урҭ иара убас иҟарҵаз аҳәамҭаҿы Амилаҭтә галереиаҿы иҟалаз абылра зус здыруа аусбарҭақәа иҭырҵаароуп, абылра иахҟьаны Ареспублика Аԥсны  ажәлар рҭоурых-культуратә ҭынха иаиуз азарал ду  ҷыдала ахшыҩзышьҭра аҭатәуп  ҳәа иазгәарҭеит.

«Аԥсны Аҳәынҭқарра аҭоурыхи акультуреи реиқәырхара иадҳәалоу аҭакԥхықәра зду аҳәынҭқарратә усбарҭақәа иҟарҵо адгылара шьҭыхтәуп ҳаамҭа иақәшәо ашәарҭадара аиҿкаара аҩаӡара аҟынӡа, уи азы аматериал-техникатә еиқәыршәара аԥҵаны», - ҳәа иаҳәоит аҳәамҭаҿы.