Аҟәа. Ажьырныҳәамза 25, 2024 шықәса. Аԥсныпресс. Жәабранмза 10 рзы абоксиор Харитон Агрба Екатеринбург ақалақь аҿы диԥылоит аԥышәа змоу урыстәылатәии адунеитәии атитулқәа рыпретендент Ваге Саруханиан (20-3-2, 4 КО). Икариера иалагӡаны Ваге Саруханиан Џьованни Страфона, Игнасио Мендос, Карлос Кордобу, уҳәа реиԥш иҟоу зыхьӡ нагоу абоксиорцәа дрыцлабхьеит, убас ала уи аԥышәа ду шимоу азгәаҭатәуп.
Раԥхьа ари аиндаҭлара аҿы дықәгылараны дыҟан Аргентинатәи аспортсмен Марселино Николас Лопес, аха уи аиндаҭлара мап ацәикыр акәхеит.
Аиндаҭлара мҩаԥысуеит апрофессионалтә бокс азы атурнир аҳәаақәа ирҭагӡаны зықьҩыла аспорт абзиабаҩцәа зкуа арена Акультура-гәырҿыхаратә Комплекс (КРК) «Уралец» аҿы.
