Апрограмма «Анхарҭаҭыԥ» ала 2023 шықәсазы иазԥхьагәаҭаз 60 млн. мааҭ рҟынтәи иазоужьхеит 47,4 млн. мааҭ.
«Апрограмма «Анхарҭаҭыԥ» ала аус зуаз акомиссиа ҷыда 60 млн. мааҭ зегьы азоужьразы аӡбамҭа аднакылеит, аха ауааԥсыра доусы акомиссиа ишьақәнарӷәӷәаз ахышәа-ҵышәа инақәыршәаны асертификатқәа ахьрыҭаз инамаданы, дара макьаназы анхарҭаҭыԥ рзымԥшаацкәа иҟоуп. Ауаҩы анхарҭаҭыԥ иԥшааит ҳәа адырра шҳаулакҵәҟьа, ҳара иаразнак афинансыркра мҩаԥаагоит», – ҳәа инаҵшьны иазгәеиҭеит аминистр.
2023 шықәсазы апрограмма «Анхарҭаҭыԥ» ала 74-ҩык рынхарҭатә ҭагылазаашьа аиӷьтәра азы аӡбамҭақәа рыдыркылеит.
Асоциалтә еиқәыршәареи адемографиатә политикеи рзы Аминистрра адыррақәа рыла, 800-ҩык инареиҳаны рынхарҭатә ҭагылазаашьа аиӷьтәреи даҽаџьара рнырхареи иадҳәалоу азҵаарақәа рзы азыҳәамҭақәа аларҵеит.
Аҳәынҭқарра Ахада Аслан Бжьаниа апрограмма «Анхарҭаҭыԥ» анагӡара аусура хадара злоу ахырхарҭоуп ҳәа иазгәеиҭеит, иара убас иарбоу ахырхарҭала аусура еиҳа амҽхак арҭбааразы афинансқәа Рминистрра адҵа аиҭеит.
