Аслан Бжьаниа дазҵааит афинансқәа рминистрра аконтроль-ревизиатә усбарҭа аусура алҵшәақәа: иҟоуп Апрокуратура хада ашҟа идәықәҵоу аматериалқәа рыла афинанстә леишәа аилагаразы аҭакԥхықәра зыдҵоу. 

Владимир Делба, раԥхьа иргыланы Аҳәынҭқарра Ахада иҭабуп ҳәа еиҳәеит афинансқәа рминистрра аусура иаиҭаз ахәшьаразы, далацәажәеит аминистрра ахылаԥшратә усбарҭақәа   русура алҵшәақәа ртәы. 

«Аконтроль-хылаԥшра усбарҭақәа зегьы русура аиҿкаареи рымҩақәҵареи рзы афинансқәа рминистрраҟны аус ауеит аконтроль-ревизиатә усбарҭа, уи аԥаратә хархәагақәа хықәкылатәи  рхархәара хылаԥшра рызнауеит. 2023-тәи ашықәси уи алҵшәақәеи: имҩаԥгоуп 19 контрольтә усмҩаԥгатә, иамҽхакуп агәаҭаразы 53 обиект.

Уи адагьы аконтроль-хылаԥшратә усбарҭақәа аус рыцурала, урҭ иҟарҵо адҵааларақәа рыла имҩаԥысуа ауснагӡатәқәа рылҵшәақәа апрокуратура хадахь, аҳәынҭқарратә шәарҭадара аусбарҭақәа, аҩныҵҟатәи аусқәа русбарҭақәа рышҟа идәықәҵахоит. 2023 шықәсазы имҩаԥаҳгеит быжь-уснагӡатәк. Урҭ рыла иақәнагоу аҭҵаарақәа мҩаԥысуеит», - иҳәеит афинансқәа рминистр.

«Ари апроблема аконтрольтә палата аусурагьы иадҳәалоуп, еизгахоит аматериал. Фактла ҳара иҳамоуп афинанстә хархәагақәа хықәкылатәи ахархәара змам, зны-зынла аӷьычра ҟазшьа змоу, убри аан аҭакԥыхқәра зыдҵоу амаҵзурауаа рхыԥхьаӡара даара имаҷуп. Абас еиԥш апроблема ыҟоуп. Ари шәақәшаҳаҭуп ҳәа сгәы иаанагоит. Баша илҵшәадоу аусура мҩаԥаҳгозар сҭахым. Сара хазы Аҳәынҭқарра Ахада Иусбарҭа аҟны изыхәҭоу аусбарҭа анапынҵа асҭоит, аконтроль-ревизиатә усбарҭа аусура нҭырхәыцааны иҭаҳҵаауеит», - ҳәа иҳәеит Аслан Бжьаниа.