Аҟәа. Жәабранмза 1, 2024 шықәса. Аԥсныпресс. И.Е. Грабарь ихьӡ зху Урыстәылазегьтәи асахьаҭыхра ҭҵаарадырра-реставрациатә Центр ахаҭарнакцәа, Аҳәынҭқарратә ҭҵаарадырра-реставрациатә Институт, Третиаков ихьӡ зху агалереиа, Аурыс музеи рхаҭарнакцәа рыла ишьақәгылоу ареставраторцәеи аспециалистцәеи ргәыԥ Аҟәантәи ихынҳәит. Урҭ Аԥсны идуу асахьақәа рфотофиксациа мҩаԥыргеит, ҳәа адырра ҟанаҵоит Урыстәылатәи Афедерациа акультура Аминистрра а-Telegram-канал.
Иара убас аекспертцәа аколлекциа ахәҭак аҭагылазаашьа азы алкаа ҟарҵеит, аиҳарак ааха зауз 60 усумҭа рҟынӡа аус рыдырулеит. Уи иабзоураны урҭ анаҩстәи рыԥхасҭахара аанкылара алыршан.
Аспециалистцәа аҭыԥантәи ареставраторцәа ааха зауз асахьақәа анаҩстәи рыҵәахра азы абжьгарақәа рырҭеит.
Еиҳа ааха зауз аусумҭақәа Москвеи Санкт-Петербурги иҟоу ареставрациатә ҟазарҭақәа рахь рыиагара азԥхьагәаҭоуп. Асахьақәа рыхәҭак реиҭашьақәыргылара аҭыԥан имҩаԥгахоит. Уи азы аспециалистцәа Аԥсны русура аплан еиқәыршәахоит.
