Атуризм ахырхарҭа ҿыцқәа активла рырҿиара, аустәқәа, ахәышәтәра-гәабзиарачаԥаратә, аекологиатә, агастрономтә, ақыҭатә, адин-ԥшьаҭыԥҭааратә, иара убас иҿыцны ицәырҵыз,  автокемпинги аглемпинги атуристтә аалыҵ амҽхак арҭбаара иацхраауеит.

«Адунеи зегьы аҿы аҵыхәтәантәи ашықәсқәа рзы ҷыдала ирылаҵәаны иҟоуп аглеемпинг. Атуристцәа еиҳа аԥсабараҿы аԥсшьара еиӷьаршьо иалагеит», - ҳәа азгәеиетит Ҭемраз Хышба.

Аԥсны Аҳәынҭқарраҟны атуристтә инфраструктура арҿиара иацхраауеит адәныҟатәи аинвестициақәеи аинвесторцәа рзы ашәахтә гәызҭаҵара змоу апакетқәеи. Асассаирҭа ҿыцқәа рыргылара, иҟоу аԥсшьарҭатә обиектқәа рырҿыцреи иара убас атуристцәа ирызку амаҵзурақәа рхаҭабзиара аиӷьтәреи рхырхарҭақәа рымҽхак арҭбаареи иацхраауеит.  Ахархәарахь ирыҭоу аобиектқәа ЗҲӘА «Уаԥстәыла» Греис Аква Вилла, ЗҲӘА «Алегьенда1», ЗҲӘА «Амшынеиқәатәи абырлаш», Аԥсны ҳаамҭазтәи аицлабралшара змоу аинфраструктура аԥҵара ишалагаз убартә иҟалеит.

Иазгәаҭоу аихьӡарақәа шыҟоугьы, атуристтә усхк аҟны ауадаҩрақәа шыҟац иҟоуп аҳәаа ахыҵреи, аинфраструктуреи, амаҵзурақәеи реиӷьтәра азҵаара инамаданы.   «Аҳәаахьчаратә пункт Ԥсоу аҟны аԥхын  изҵоу инамыцхәны аидара инамаданы арҿыцра аҭахны иахьыҟоу, аԥсшьарҭа ҭыԥқәа рыҟны асервиси атуристцәа рҭагылазаашьеи реиӷьтәразы лассы ауснагӡатәқәа  мҩаԥгатәуп», - иҳәеит Ҭемраз Хышба. 

Аԥсны Аҳәынҭқарра атуризм аԥхьаҟа арҿиареи ари аусхк аиӷьтәреи рзы аусмҩаԥгатәқәа мҩаԥнагоит ажәалагалқәа рымҽхака ырҭбаауа, амаҵзурақәа рхаҭабзиара еиӷьтәуа.   Аминистр Ахада адырра ииҭеит Атуризм аминистрра атуризм хкы ҿыцқәа рырҿиаразы аԥшьгара ҿыцқәа шазԥхьагәагнаҭо. 

Аԥсны Ахада аминистр адҵа ииҭеит аусхк аҿиара аплан азырхиаразы, убри аан ҷыдала хшыҩзышьҭра аиҭарц мрагыларатәи Аԥсны аганахь атуристцәа раҭаара аизырҳара. «Ҳара ҳтәыла алшарақәа ҳдыруазароуп, уаҵәтәи амш зеиԥшрахогьы ҳхаҿы иааҳгароуп. Шәача ақалақь шықәсык 7 млн атуристцәа аднакылоит, Аԥсны Аҳәынҭқарра хынтә еиҳаны ишаҵанакуагьы, ашықәс азы  550 нызқь роуп иаҳтаауа. Ҳзызхәыцша, иҟаҳҵаша ыҟоуп», -  ҳәа иҳәеит  Аслан Бжьаниа.