Аҟәа. Жәабранмза 7, 2024 шықәса. Аԥсныпресс. Агәабзиарахьчара аминистр Едуард Быҭәба Ареспубликатә хәыҷтәы хәышәтәырҭа аҿы анҭыҵтәи аилатәара мҩаԥигеит.
Ахәышәтәырҭа ахь аинспекциатә ҭаара ауааԥсыра рҟынтәи ахәышәтәырҭа аусура аганахьала лассы-лассы иаадырԥшуа иалагаз агәынамӡарақәа ирыдҳәалахеит, ҳәа адырра ҟанаҵоит агәабзиарахьчара Аминистрра апресс-маҵзура.
«Иҟоуп уадаҩрақәак, иҟоуп шәусура аганахьала аҽԥынкыларақәа, агәабзиарахьчара Аминистррахьы ауаа ашуеит. Ҳара араҟа арҭ азҵаарақәа ҳаӡбароуп», – ҳәа иҳәеит аминистр. Уи аҳақьымцәа амедусбарҭа амаҵзурақәа зегьы русура азы адырра ҟарҵарц азы аҳәара ҟаиҵеит.
Аҳақьымцәа данрыҿцәажа ашьҭахь еилкаахеит ахирургиатә маҵзура азы иаахәаз амаругақәа аинсталлиациа аетап аан атехникатә уадаҩрақәа шцәырҵыз, убри аҟнытә уи инагӡаны аус арура залмыршахеит.
Аминистр аамҭа кьаҿ иалагӡаны амаругақәа аус рырура азы апрофильтә специалистцәа рынашьҭра азы адҵа ҟаиҵеит.
Агхақәа аарԥшын ахәышәтәырҭа абиохимиатә лабораториа аусура аҿы.
Аминистр ахәыҷқәа ианаамҭоу зхаҭабзиара ҳараку ацхыраара рыҭара иаҵоу аҵакы дазааҭгылеит. Иарбоу аусура ахырхарҭа аминистр ихадоу акакәны иазгәеиҭеит. Хыхь иарбаз аусмҩаԥгатәқәа рынагӡара иара хаҭала ахылаԥшра аиҭалоит ҳәа инаҵшьны иазгәеиҭеит агәабзиарахьчара аминистр Едуард Быҭәба.
