Аҟәа. Нанҳәамза 18, 2023 шықәса. Аԥсныпресс. Аԥсны Адәныҟатәи аусқәа рминистр Инал Арӡынба аплатформа «Аԥсны аԥеиԥш» алахәылацәа рԥылараан далацәажәеит ҳтәыла акәша-мыкәша иҟоу актуалтә политикатә ҭагылазаашьа, Аахыҵ Кавказ арегион аҟны аҭыԥ змоу аҭагылазаашаьқәа, ҳпартниор хада – Урыстәылатәи Афедерациа азыҟазаашьаҿы аԥыжәара змоу азҵаарақәа ртәы.

Аԥсны Адәныҟатәи аусқәа рминистр ҷыдала дазааҭгылеит Урыстәылатәи Афедерациа Аԥсны Аҳәынҭқарра иазыҟанаҵо афинанстә цхыраара:

«Урыстәыла 2008 шықәса раахыс Аԥсны 110 миллиард мааҭ афинанстә цхыраара анаҭахьеит. Урҭ рҟынтәи 30 миллиард мааҭ – инвестициатә программоуп изҵазкуа, абиуџьеттә инвестициақәа ҳәа ишьоуп.

Даҽа 40 миллиард мааҭ – аулафахәқәа роуп. Абиуџьетбжьаратә еизыҟазаашьақәа ирыҵаркуам аҽа 40 миллиард мааҭ – атәанчахәқәа. Атәанчахәытә цхыраара аҳасаб ала ҳтәыла иаиуеит шықәсык аҩныҵҟа 4 миллиард мааҭ. Ииасыз амзазы 24 400-ҩык ҳтәылауаа ироуит урыстәылатәи атәанчахәытә шәарақәа. Ари бжьаратәла мызкы 300 миллион мааҭ инаӡоит. Аԥсуа тәанчахәы 500 мааҭ роуп иҟоу. Атәылауаҩ урыстәылатәи атәанчахәы имоуазар, иара шәарак аҳасаб ала изыршәоит 2500 мааҭ. Атәанчахәы, иреиҵоу анхаралшаратә зыԥҵәа, 10 000 мааҭ аҟынӡа инаӡарц азы абиуџьет аҿа миллиард мааҭ аҭаххоит. Ар реиҭарҿыцра акәзаргьы иақәхарџьтәуп миллиард мааҭ еиҵамкәа аԥара. Иара убасҵәҟьоуп ишыҟоу егьырҭ аусхкқәа – агәабзиарахьчара, раҵарадырра уҳәа рҟынгьы. Напеиқәыԥса атәара алшом. Иԥшаалатәуп ахыҵхырҭа ҿыцқәа».

Инал Арӡынба иҳәеит уаанӡа, Аԥсны Аҳәынҭқарреи Урыстәылатәи Афедерациеи еицырзеиԥшу Ар рыхәҭа аԥҵаразы алшара ахы иашамырхәаз, Очамчыра араин аҿы арартә қалақь аиҿкаара шалыршамыз.

«Иҳалшои иҳалымшоуи анализ рзыҟаҳҵалароуп, аҭагылазаашьа шьаҿак ԥхьаҟа ҳаԥысны ахә ҳшьалароуп, ацәаныррақәа аԥыжәара рыҭара ахәҭам. Урҭ ҳара шьҭахьҟа ҳдыргьыжьуеит ауп. Урыстәыла ахада Иусбарҭаҿы сусураан сара знымзар зны исмаҳаит Аԥсны аекспансиа аӡәы иҭахны».

Қырҭтәыла иҟоу аҭагылазаашьаз азҵаара аҭак ҟаҵо Арӡынба иҳәеит Қырҭтәылеи Урыстәылеи рыбжьара ахәаахәхҭратә еикәыршара 2,5 млрд. рҟынӡа ишхалаз, Урыстәыла Қырҭтәылаз хәаахәҭратә партниорны ишыҟоу, Қырҭтәылагьы аекономикатә интересқәа адгылара шрырҭо.

Арӡынба иара убасгьы дазааҭгылеит ақырҭуа диаспора Урыстәыла русура.

«Адунеитә економикеи адунеитә политикеи – еиндаҭло усхкқәоуп. Аиндаҭлараҿы уаҵахар, иуылымшар жәларбжьаратәи апроцессқәа рҳәаа уахцахоит» ҳәа иҳәеит аминистр.

Иара иҳәеит Урыстәылеи Аԥсни рыстратегиатә ԥеиԥш ахаҭабзиара амазароуп ҳәа.

Аҟәа. Нанҳәамза 25, 2023 шықәса. Аԥсныпресс.  Нанҳәамза 23 – 24 рзы Аҟәа ақалақь, С.У.Багаԥшь ихьӡ зху аспорт Ахан аҿы имҩаԥысуан зхы иақәиҭу аиқәԥара азы Жәларбжьаратәи атурнир «Ажәларқәа реиҩызара».  Атурнир 2014 шықәса инаркны есышықәса имҩаԥысуеит.

Аицлабрақәа рхы аладырхәит 2008 - 2009, 2010 - 2011 и 2012 – 2013 шш. рзы ииз  арԥарцәа, Аԥсны ақалақьқәеи араионқәеи зегьы рҟынтәи, иара убас Урыстәыла  (Адыгеиа,  Даӷьсҭан, Ҟабарда-Балкариа, Краснодартәи атәылаҿацә, Москватәи аобласть, Шәача ақалақь, Чувашиа) рҟынтәи 150-ҩык инареиҳаны аспортсменцәа.

Ҩымш имҩаԥысуаз аицлабрақәа рышьҭахь Аҟәа аԥхьахәтә  ҭыԥқәа ақалақь Ахадара аҿари аспорти русқәа рзы Аусбарҭа зхы иақәиҭу аиқәԥара асекциа аспортсменцәа рыбжьара абасала еихшахеит:

Аҟәа. Нанҳәамза 25, 2023 шықәса. Аԥсныпресс.  Урыстәылатәи Афедерациа ала Аԥсны Аҳәынҭқарра ахьыԥшымреи асуверенитети азхаҵара ҟалеижьҭеи 15- шықәса аҵра инамаданы,  Аԥсны аԥышәатә режим ала аусура иалагеит аелектронтә интернет-портал «Абхазия.РФ».

Амедиапроект «Аԥсни Урыстәылеи» ауаажәларратә еидгылара акультуреи аспорти адгылара аҭаразы Агәыҳалалратә Фонд «ЮнОлимп» (ақ. Москва) ацхыраарала «Аԥсны иқәынхо аурысцәа рхеилак» ала иаԥҵоуп.

Абизнесуаҩ Ҭемыр Заркуа иҿцәжәара иабзоураны, адомен «Абхазия.РФ» аԥсны-урыстәылатәи аҩганктәи аизыҟазаашьақәа рыҿиареи Аԥсны аинформациатә ҿиареи рзы Ауаажәларратә Еиҿкаара «Аԥсны иқәынхо аурысцәа рхеилак» ахантәаҩы Роман Риазанцев хәыда-ԥсада иаҭан.   

Аҟәа. Нанҳәамза 25, 2023 шықәса. Аԥсныпресс. Аԥсны акикбоксинг Афедерациа ҭаҷкәымла аисратә клуб «Чемпион» ааӡамҭа  Григор Оганиан Таиланд имҩаԥысуаз К-1 азы апрофессионалтә турнир аҳәаақәа ирҭагӡаны имҩаԥгаз аиндаҭлара аҿы Германиатәи аиндаҭлаҩ  анакаут ала дииааит.

«16 шықәса зхыҵуа Григор Оганиан диԥылеит  27-шықәса зхыҵуа Германиатәи аиндаҭлаҩ, уи анакаут ала дииааит. Хә-раунд рыла ишьақәгылараны иҟаз аиндаҭлара, ҩ-раундгьы нагӡаны имҩаԥымсӡеит», – ҳәа иҳәеит аспортсмен изыҟаҵаҩ, Аԥсны кикбоксинг Афедерациа апрезидент ихаҭыԥуаҩ Нико Сааков.

Аҟәа. Нанҳәамза 25, 2023 шықәса. Аԥсныпресс. Аԥсны Жәлар Реизара-Апарламент Аиҳабы Лаша Ашәба Урыстәылатәи Афедерациа ала Аԥсны ахьыԥшымра азгәаҭара ҟалеижьҭеи 15-шықәса аҵра Амш азгәаҭара иазку аныҳәатә усмҩаԥгатәқәа рылахәхаразы Аԥсныҟа иааз  Урыстәылатәи Афедерациа Афедералтә Еизара Афедерациа Ахеилак аделегациа идикылеит. Аделегациа аилазаараҿы иҟан – Афедерациа Ахеилак ахантәаҩы ихаҭыԥуаҩ Константин Косачиови Афедерациа Ахеилак атәылахьчареи ашәарҭадареи рзы Аилак ахантәаҩы актәи ихаҭыԥуаҩ Владимир Чижов. Аиԥылара аартуа, Жәлар Реизара-Апарламент Аиҳабы асасцәа бзиала шәаабеит ҳәа реиҳәеит: «Ҳара ҳгәырӷьара ҳацеиҩышәшарц шәахьаҳзааз даара гәахәарыла иҳадаҳкылоит. Аԥсны Аҳәынҭқарреи  Урыстәылатәи Афедерациеи ҭоурыхла аиҩызаратәи аимабзиаратәи аизыҟазаашьақәа рыбжьоуп. Ҳара аԥсуа жәлар рмилаҭтә хаҭара аиқәырхара аҿы Урыстәыла иҟанаҵо адгылара ҳаҭыр ду ҳзақәуп», - ҳәа иҳәеит Апарламент Аиҳабы. Иара Урыстәылатәи Афедерациа Ахада Владимир Путин Аахыҵ Уаԥстәылеи Аԥсны Аҳәынҭқарреи рыжәларқәа рганахьала иамоу апринципиалра зныԥшуа ипозициа азы иҭабуп ҳәа иҳәеит.  

Аҟәа. Нанҳәамза 25, 2022 шықәса. Аԥсныпресс.  Нанҳәамза 24 рзы Гагра ақалақь аҿы амашәыртә хҭыс ҟалеит.  Аскутерныҟәцаҩ аӡытә мотоцикл дақәтәаны мшынла дышнеиуаз аӡы иҭаз аԥсшьаҩы диаахеит. Аԥсшьаҩы ахбаҩ-лашатә ааха иоуит.  

Гагра ақалақь ахада ихаҭыԥуаҩ Адамыр Цышба иҟаиҵаз адыррақәа рыла, ааха зауз аԥсшьаҩы Аҟәа ақалақь Ареспубликатә хәышәтәырҭахь днаргеит. «Ааха зауз аԥсшьаҩы асабрада иҿаҵаны аӡааҟәрыла ҟаиҵон. Уи зны аӡы дхылон, ӡных иҽӡааиҟәрылон. Аскутерныҟәцаҩ уи дизгәамҭаӡакәа диӷрысит.

Иаарту ахбаҩ-лашатә ааха зауз аԥсшьаҩы Гагратәи араионтә хәышәтәырҭа Хада ахь днаргеит. Уаҟа иара иҭагылазаашьа гәарҭеит, ахьаахәыга иларҵеит, анаҩс ареанимобиль ала Аҟәаҟа, Ареспубликатә хәышәтәырҭа анеирохирургиатә ҟәша ахь ддәықәырҵеит», –  ҳәа адырра ҟаиҵеит Адамыр  Цышба.

Аҟәа. Нанҳәамза 25, 2023 шықәса. Аԥсныпресс. Аԥсны Аҳәынҭқарра ахьыԥшымра жәларбжьаратәи азхаҵара  Амш иазку аныҳәатә усмҩаԥгатәқәа рылахәхаразы Аԥсныҟа иааит Урыстәылатәи Афедерациа Афедерациа Ахеилак Афедералтә Еизара аделегациа.  

Аҟәа. Нанҳәамза 25, 2023 шықәса. Аԥсныпресс. Урыстәылатәи Афедерациа Ашәарҭадара Ахеилак Амаӡаныҟәгаҩ  Николаи Патрушев Аԥсны ашәарҭадара Ахеилак  Амаӡаныҟәгаҩ  Сергеи Шамба  Урыстәылатәи Афедерациа ала Аԥсны Ахьыԥшымра азхаҵара Амш идиныҳәалеит.

«Ҳаҭыр зқәу Сергеи Мирон-иԥа! Ишәыдысныҳәалоит Урыстәылатәи Афедерациа ала Аԥсны Ахьыԥшымра азхаҵара ҟалеижьҭеи  15-шықәса аҵра Амш.

Аҟәа. Нанҳәамза 25, 2023 шықәса. Аԥсныпресс. Аԥсны Аҳәынҭқарра Ахада Аслан Бжьаниа Урыстәылатәи Афедерациа Ашәарҭадара Ахеилак Ахантәаҩы Ихаҭыԥуаҩ Дмитри Медведев диԥылеит.

Дмитри Медведев Аслан Бжьаниеи аԥсуа жәлар зегьи Урыстәылатәи Афедерациа ала Аԥсны аҳәынҭқарратә хьыԥшымра азхаҵара ҟалеижьҭеи  15-шықәса аҵра инамаданы дрыдныҳәалеит, ирзеиӷьаишьеит аҭынчреи аизҳазыӷьареи аманшәалареи.

«Шәбара даара сеигәырӷьоит. Ааигәа иазгәаҳҭараны ҳаҟоуп акыр зҵазкуа арыцхә – Урыстәылатәи Афедерациа ала Аԥсны Аҳәынҭқарреи Аахыҵ Уаԥстәылеи  рҳәынҭқарратә хьыԥшымра азхаҵара ҟалеижьҭеи  15-шықәса аҵра.  Уи азы 2008 шықәсазы Урыстәыла иаднакылаз аӡбамҭа ус имариаз усӡамызт, аха уи иабзоураны Кавказ иахьаҵанакуаз аҭынчра ашьақәыргылареи ареспубликақәа руааԥсыра рыԥсҭазаареи ргәабзиареи рыхьчареи актуалра злоу ахыдҵақәа рыӡбареи алыршахеит. Уи нахыс ҳаизыҟазаашьақәа хра злоу аҿиара аманы иаауеит, аидгыларатә, аимабзиаратә еизыҟазаашьақәа ҳабжьоуп, аринахысгьы ус ишыҟало агәра сгоит.   Сара исымоу алшара схы иархәаны шәреспубликақәа руааԥсыра ахьыԥшымра, жәларбжьаратәи азин асубиект ҿыцқәа роура  рыдысныҳәалоит, ирзеиӷьасшьоит ақәҿиарақәеи аизҳазыӷьареи.  Хаҭала Шәаргьы иара убас ари ихадоу арыцхә шәыдысныҳәалоит», - ҳәа иҳәеит Дмитри Медведев.

Аҟәа. Нанҳәамза 25, 2023 шықәса. Аԥсныпресс.  Урыстәылатәи Афедерациа Ашәарҭадара Ахеилак амаӡаныҟәгаҩ актәи ихаҭыԥуаҩ Рашид Нургалиев Урыстәылатәи Афедерациа ала Аԥсны ахьыԥшымра азхаҵара ҟалеижьҭеи 15-шықәса аҵра инамаданы дидныҳәалеит. 

Адныҳәаларатә цҳамҭа атекст аҿы ахәҭакахьала иҳәоуп:

«Ҳаҭыр зқәу Сергеи Мирон-иԥа! Гәык-ԥсыкала ишәыдысныҳәалоит Урыстәылатәи Афедерациа ала Аԥсны ахьыԥшымра азхаҵара ҟалеижьҭеи 15-шықәса аҵра. Арегионалтә ҭышәынтәалареи ашәарҭадареи ирыдҳәалоу азҵаарақәа рыӡбараҿы аусеицура аҩаӡара ҳаракы аҟынӡа анаӡара алыршара Урыстәылеи Аԥсни рыжәларқәа ирыбжьоу аиашьаратә еизыҟазаашьақәа рырӷәӷәара иазкуп.