Иарбоу азҵаара ала инарҭбаау аинформациа аиуразы Аԥсны иҟоу Урыстәылатәи Афедерациа ацҳаражәҳәаҩ ихьӡала ашәҟәы дәықәҵан.

«Иааз аҭак ала ишеилкаахаз ала, ашықәс аихшьаалақәа рыла, авиза аиуразы Аԥсны иҟоу Урыстәылатәи Афедерациа Ацҳаражәҳәарҭа иадҵаалаз Туркменисҭан атәылауаа рхыԥхьаӡара 5-нызықьҩык рҟынӡа инаӡоит. Абҵарамза 7, 2023 шықәса инаркны авиза аиура зҭаху рыдкылара аиҿкаара азы иарбоу аконсултә маҵзура аелектронтә шәҟәҭаҩрала имҩаԥысуеит», – ҳәа адырра ҟалҵеит Анас Кьышьмариа.

Аомбудсмен иҿы имҩаԥгаз аҳәаанырцәтәи атәылауаа рыдкыларақәа раан урҭ урыстәылатәи авиза аиуразы Аԥсны рыҟазаара акы изыруадаҩуаз аиндивидуалтә ҟазшьа змаз апроблемақәа ртәы еилкаахеит.  Уи – Аԥсны Аҳәынҭқарра иахьаҵанакуа акыраамҭа аҟазаара иадҳәалоу ахарџь инамаданы иуадаҩу аматериалтә ҭагылазаашьа, иҟан зцәа зтәымыз аҳәса (ахԥатәи атриместр иҭагылаз), астационартә хәышәтәра зҭаху ачымазарақәа зыхьыз, иара убас Урыстәыла аҵараиурҭақәа рҿы аҵара зҵоз.

«Аԥсны Аҳәынҭқарраҿы иҟоу Урыстәылатәи Афедерациа Ацҳаражәҳәарҭеи Аԥсны ауаҩы изинқәа рыхьчаразы Азинмчы змоу Иаппарати ирыбжьоу аҩганктәи аусеицура аҳәаақәа ирҭагӡаны, аҳәаанырцәтәи атәылауаа аомбудсмен иахь иаарышьҭуаз арзаҳалқәа зыԥшра ҟамҵақәа иӡбатәу аҭагылазаашьақәа алкааразы аус рыдулахон. Аус зыдулаз арзаҳалқәа рзы аматериалқәа зегьы азыҳәаҩ дзықәшәаз ауадаҩра арбаны, анаҩс изаамҭанымкәа авиза аиура алыршаазы Аԥсны иҟоу Урыстәылатәи Афедерациа Ацҳаражәҳәарҭа ахь идәықәҵахон», - ҳәа иазгәаҭоуп ажәахә аҿы.

Жәҩык азыҳәаҩцәа рҟынтәи ҩыџьа аҳәаанырцәтәи атәылауаа изықәшәаз ауадаҩрақәа ҳасаб азуны изаамҭанымкәа Урыстәылатәи Афедерациа авиза рауиара алыршахеит. 

Аомбудсмен лгәаанагарала аус атәы здыруа Аԥсны  аусбарҭақәа  ишьақәгылаз  аҭагылазаашьа анаҩстәи аҭышәынтәалара азы иназыцҵоу ауснагӡатәқәа рымҩаԥгара шхымԥадоу рырдырра ахәҭоуп.