Азал азы
Ақәгыларақәа рзы азал ҳара машәыршақәа иалҳамхӡеит. Уамакала иԥшӡоу асахьаркыра Академиа ахыбра XVIII ашәышықәсазы идыргылеит, уи иаҭаауан усҟантәи аамҭазы петербургтәи абомонд еицырдыруаз ахаҭарнакцәа аӡәырҩы, иаагозар, Алеқсандр Пушкин, Алеқсандр Виаземски. Иуҳәар алшоит ари иуникалу аҵакыра ес-ԥшьыркцатә сантиметр аурыс культура аҭоурых алаҽны иҟоуп ҳәа.
Азал игьежьу аформа амоуп, араҟа иҟоуп уамашәа иԥшӡоу, сахьала иҩычоу аплафон, зеиӷьаҟам акустика амоуп. Азал аҩныҵҟа – заамҭа иақәшәо аҩнымаҭәа ҩнагылоуп, аҭыӡқәа рҿы икнаҳауп Академиа аартра инаркны уи напхгара азҭоз 12-ҩык апрезидентцәа зегьы рпортретқәа. Абри зегьы иссиру атмосфера аԥнаҵоит, уи ҳагәыланахалеит ҳаргьы, анагӡаҩцәеи ҳахәаԥшцәагьы.
Ақәгылара азы
Аконцерт иҳараку азанааҭтә ҩаӡараҿы имҩаԥысит. Уи аинтернацианалрала иалкаахеит. Валери Макаров Москва ахьӡала дықәгылон, Ана Кучериавыи - Молдовеи Санкт-Петербурги рыхьӡала, Гульнара Валеева - Башкортосҭан, Андреи Логвинов - Белоруссиа. Ахәаԥшцәа рылаԥш иақәшәеит иара убас Ҭаҭарсҭанынтәи иааз апианинорҳәаҩы Саид Хусаинови аскрипкарҳәаҩы Иаков Асташини рдует. Урҭ реицықәгылара иаанарԥшит ирыбжьоу ансамбль азы ихымԥадатәиу аилибакаареи авиртуозреи. Ароиал аҿы акомпонимент налыгӡон Елизавета Поздниакова, аконцерт мҩаԥигеит Александр Руснак.
Даара гәахәара духеит адгылара ҳаҭаразы иахьааз Санкт-Петербургтәи аԥсуа аидгьылтәра ахаҭарнакцәа.
Ҳара ҳмузыкатә лабораториа алауреатцәа рықәгылара ахәшьара ҳарак аиҭеит Царскосельсктәи агимназиа аректор Иури Сидоров. Уи инагӡахараны иҟоу амузыкатә проект азы агимназиа аҿы аҟазара-аклассқәа рымҩаԥгаразы ааԥхьара ҳаиҭеит. Аконцерт аинтерес ду лызцәырнагеит Санкт-Петербургтәи атеатралтә ҟазара академиа адоцент, аҟазарадырра акандидат Мариа Александровскаиа, уи актиортә ҟазара иазку лмонографиа Урыстәылеи Франциеи атеатралтә ҵараиурҭақәа рыстудентцәа рзы ихымԥадатәиу дисциплинаны иҟоуп. Апрофессионалтә еилазаараҿы ари аҩыза арезонанс ҳара даараӡа ҳаргәырӷьоит.
Ҳара идуӡӡаны иҭабуп ҳәа раҳҳәоит ари ахәылԥаз иаҭааз зегьы. Апроект Урыстәылатәи Афедерациа Ахада иҟны иҟоу акультуратә аԥшьгарақәа Рфонди Аԥсны Аҳәынҭқарра Анапхгареи рыцхыраарала инагӡахеит.
Иҳәаадоу адиалог иацҵахоит…
