Аԥсны асахьаҭыхыҩцәа Реидгыла ацәыргақәҵатә зал Хада адиректор Ельвира Арсалиа, ацәыргақәҵа аартуа, иааиз зегьы бзиала шәаабеит ҳәа ралҳәеит, иара убас ақалақь Амшныҳәа рыдылныҳәалеит.
«Ҳара зегьы бзиа иаабо ҳақалақь гәакьа иахыҵит 2 509 шықәса. Ари аиашазы иуникалу хҭысуп. Адунеи аҿы усҟаҟ ирацәамзар ҟалап ас еиԥш ибеиоу аҭоурых иахыҽхәартә иҟоу ақалақьқәа. Аҟазара иазку асалон, уаанӡа еиԥш уажәгьы ҳныҳәа ихадоу хәҭаны иҟоуп. 2000 шықәсазы ҳцәыргақәҵатә проект ахацыркра аныҟала инаркны иахьа уажәраанӡа, есышықәса, ақалақь Амш аҽны ҳара Аҟәа иазку ацәыргақәҵа еиҿаҳуаауеит. Ацәыргақәҵа ашьақәгылашьа аҽаԥсахуеит, аха атема шыҟац иаанхоит. Ҳара уажәтәи ҳцәыргақәҵа – ари Ацәыргақәҵатә зал Хадеи Аԥсны Абанк Амузеи Аԥснытәи аколлекционерцәа Реилазаареи еицынарыгӡо раԥхьатәи апроект иалшәахаз аусмҩаԥгатә ауп. Ҳара гәадурала ахатәы коллекциақәа рҟынтәи аусумҭақәа цәыраҳгоит. Ҷыдала ахшыҩзышьҭра аҭахоит аграфика, алитографиеи XIX ашәышықәса анҵәамҭеи иахьатәи ҳаамҭеи рҟынӡа иаҵанакуа афотоҭыхымҭақәеи. Ари ацәыргақәҵа аекспонатқәа рыла адагьы, Аҟәа ахаҿы ашьақәгылараҿы ихадоу ароль назыгӡаз ауаа рылагьы ауникалтә ҟазшьа аҵоуп», – ҳәа илҳәеит Ельвира Арсалиа.
Лара иаадырԥшыз адгылара азы ақалақь ахада Ҭемыр Агрба, иара убас аколлекцианерцәа Олег Папасқьыр, Ибрагим Ҷкадуа, Виачеслав Чыркба, уҳәа егьырҭ иҭабуп ҳәа ралҳәеит.
«Ишьақәгылаз аҭагылазаашьаҿы ахатәы коллекциақәа еиҳагьы ихәдуны иҟалоит, урҭ рҟынӡа анаӡара ҳсахьаҭыхратә еилазаара акыр иарбеиоит. Ҳара агәра ганы ҳаҟоуп аколлекционерцәа рҟынтәи иҳауо адгылара акультура арӷәӷәара ишацхраауа, насгьы ҳара ҳсахьаркыратә ԥсҭазаара еиҳа игәылҭәааны ишыҟанаҵо. Ақалақь Амш шәыдысныҳәалоит иахьа абраҟа еизаз зегьы! Ҳақалақь Аҟәа иамоу аҭоурых беиеи зеиӷьаҟам аҟазареи рыла акыр шықәса иаршанхалааит ҳасасцәа», – ҳәа илҳәеит Ельвира Арсалиа.
Аҳҭнықалақь ахада Ҭемыр Агрба аусмҩаԥгатә аиҿкааҩцәа иҭабуп ҳәа раҳәо адунеи аҿы ас еиԥш ақәра ду — 2509 шықәса ахыҵра ала иҽхәаратәы иҟоу ақалақьқәа уамак ирацәаӡам ҳәа инаҵшьны иазгәеиҭеит.
Ацәыргақәаҵа ԥхынгәымза 15 аҟынӡа аус аулоит.
