Аҳәынҭқарра Ахада иазгәеиҭеит иахьарнахыс Шәачеи Аҟәеи рыбжьара амшынтә еимадара шеиҭахацыркхо.

Ахәҭакахьала, Сергеи Кириенко Аҳәынҭқарра Ахада иҭабуп ҳәа еиҳәеит иоуз ааԥхьареи асасдкылара шьахәи рзы.

«Сеигәырӷьоит ҩаԥхьа Аԥсны сахьаҭаауа. Ҳара имаҷымкәа аӡбамҭақәа ҳзеизеит, урҭ рыла иаамҭоуп аихшьаалақәа рыҟаҵара. Урҭ амшынтә еимадареи амшын аԥшаҳәа ареконструкциа актәи аетапи, уҳәа аусқәа жәпакы ирыдҳәалоу роуп», – ҳәа иҳәеит Сергеи Кириенко.

Иара Бадра Гәынба Курсктәии Белгородтәи аобластқәа рҟынтәи ахәыҷқәа Аԥсны рыдкылареи рыԥсшьараамҭа аиҿкаареи рзы иҭабуп ҳәа еиҳәеит.

«Асасдкылара злоу, амра ашәахәақәа хааӡа изхаԥхо Аԥсны аҟазаара, агәра ганы сыҟоуп, ахәыҷқәа рыԥсҭазаараҿы ирхамышҭуа ацәаныррақәа шырзааннажьуа», – ҳәа иҳәеит иара.

Уи иара убас акыр хара имгакәа аамҭарацәа  раахыс Аԥсны аус ацура зыбжьоу урыстәылатәи арегионқәа рхыԥхьаӡараҿы Санкт-Петербург шыҟало азгәеиҭеит. Уи ареспублика аҵарадырратә  усбарҭақәа адгылара рыҭара, иара убас аԥснытәи ашколхәыҷқәа рыдкылара иазхиоуп.

Сергеи Кириенкои Бадра Гәынбеи иара убас аенергетикеи амҩатә ргылареи русхкқәа рҿы аусеицура амҩаԥысшьа  абжьаратә еихшьаалақәа  ҟарҵараны  иҟоуп.  

«Урыстәылатәи аминистррақәеи ахылаԥшырҭақәеи зегьы аԥышәеимадара иазхиоуп.  Шәара шәхала иалышәхырц шәылшоит уажәазы еиҳа ихадоу, еиҳа ихымԥадатәиу ахырхарҭа», – ҳәа иазгәеиҭеит Сергеи Кириенко.