Санкт-Петербургҟа аԥыррақәа ирылагоит аҳаиртә еилазаара «iFly». Урҭ зкомфортра ҳараку аҳаирпланқәа Airbus 330 рыла мчыбжьык ахь ҩынтә имҩаԥыслоит. Ареисқәа мҩаԥыслоит хашалеи мҽышалеи абри аиханҵа инақәыршәаны:
– Аҟәатәи иҵԥраауеит асааҭ 09:15 рзы, Санкт-Петербург итәоит асааҭ 13:30 рзы;
– Санкт-Петербургынтәи иҵԥраауеит асааҭ 15:00 рзы, Аԥсны аҳҭнықалақь Аҟәа итәоит асааҭ 19:15 рзы.
Иахьазы Аҟәатәи аҳаирбаӷәаза иаднакылоит Москва, Нижни Новгороди Ханты-Мансиски ақалақьқәа рҟынтәи ареисқәа.
Аҳаиртә еимадара аиҭашьақәыргылара ҟалеижьҭеи Аԥснытәи аҳаирбаӷәаза 200 реис аднакылахьеит. Апассаџьырцәа рхыԥхьаӡара 40 нызықьҩык иреиҳауп, аус адулан 300 тонна инарзынаԥшуа аидара.
