Урыстәыла ааглыхыҩцәеи аусдкылаҩцәеи Реидгыла апрезидент Алеқсандр Шохин  убасҵәҟьа иазԥхьагәаҭаны имоуп афорум ахалархәра, уи ҩаԥхьа урыстәылатәи абизнес Аахыҵ Уаԥстәыла еицыфеидоу аекономикатә еимадарақәа рыбжьаҵара ишазҿлымҳау арҵабыргуеит.

Алеқсандр Шохин акыр шықәса ҵуеит инеиԥынкыланы абизнеси анапхгареи рыбжьара аконструктивтә диалог абжьаҵара дадгылоижьҭеи, иара аинвесторцәа рзы иманшәалоу аҭагылазаашьақәа раԥҵареи урыстәылатәи аилазаарақәа жәларбжьаратәи акооперациатә еилазаарақәа рахь ринтеграциеи дадгылоит. Иара инапхгарала Урыстәыла ааглыхыҩцәеи аусдкылаҩцәеи Реидгыла  ааглыхра атехнологиатә рҿыцра, акапитал адыԥхьалареи аҳәаанырцә иҟоу урыстәылатәи абизнес апозициақәа рырӷәӷәареи  иазырхоу аԥшьгарақәа қәҿиарала инанагӡоит.

«Урыстәылатәи ааглыхыҩцәеи аусдкылаҩцәеи Реидгылеи уи алахәылақәас иҟоу аилазаарақәеи аус рыцурала Аахыҵ Уаԥстәыла абизнес Евразиатәи аекономикатә Еидгыла аџьармыкьақәа рахь анаӡаразы алшара  аиуеит. Ҳара убасҵәҟьа Идуу Евразиатәи апартниорра аформат аҿы апроектқәа реицынагӡара аперапективақәа шыҟоу аабоит», — ҳәа инаҵшьны иазгәеиҭеит Алеқсандр Шохин.

Афорум аҳәаақәа ирҭагӡаны араҟа ирылацәажәараны иҟоуп аусеицуреи аинвестициақәеи рзы алшарақәа рырҭбаара, абанктә усхкы, атехнологиатә проектқәа адгылара рыҭара, афинанстә инструментқәа рыҿиара, атуризм, аҿар раԥшьгарақәа, аусдкылара ирыдҳәалоу азҵаарақәа, иара убас Аахыҵ Уаԥстәыла аекономика иҭышәынтәалоу аҿиареи амодернизациеи рзы акыр аамҭа зҵазкуа апрограммақәа.  

I Жәларбжьаратәи аекономикатә Форум «Аахыҵ Уаԥстәыла. Аинвестициақәа рылаԥшҳәаақәа» аспорт Ахан «Олимп» аҿы имҩаԥгахоит. Афорум азы еиҳа инарҭбаау аинформациа аиура алшоит ателеграм-канал  t.me/alaniaforum аҿы, иара убас  асаит alaniaforum.org аҿы.

Амедиагәыԥ «Аԥснымедиа» афоррум аинформациатә партниорцәа рхыԥхьаӡараҿы иҟоуп.