«Аԥснынтәи иаҳзааит ажәабжь лахьеиқәҵага. Машәырла дҭахеит Станислав Зосим-иԥа Лакоба. Иналукааша аҵарауаҩ, аҭоурыхҭҵааҩ, ауаажәларратә усзуҩы,  лассы-лассы иуҧымло аҟыбаҩи адыррақәеи змаз ауаҩы. Аԥсны азы ари цәыӡ дууп.

Станислав Зосим-иԥа ҳаҭыр дула сизыҟан. Игәаанагара еснагь сазҿлымҳан. Аицәажәараҿы уамак ала даамысҭашәан: амҵақьақьара иламызт, аӡәы сигәаԥхандаз ҳәа дашьҭамызт, еснагь иҳәон игәы ишаанагоз еиԥш. Иарбан зҵааразаалак иара хатәзнеишьала дахәаԥшуан.

Разҟуп ҳәа исыԥхьаӡоит згәаанагареи зыхәшьарақәеи мҩақәҵагоу ауаҩы иҧшаара. Урҭ ауаа еснагь аиаша рҳәоит, даҽакала иудырбоит иӡбоуп ҳәа иҧхьаӡаз азҵаарақәа. Сара сзы ус иҟаз уаҩын Станислав Зосим-иҧа Лакоба. Агәра ганы сыҟоуп Аҧсни уи анҭыҵи сара сеиҧш ихәыцуа ауаа шырацәоу.

Гәыкала срыдышшылоит наунагӡа ҳгәаҵаҿы иаанхо Станислав Зосим-иԥа иуацәеи иҭынхацәеи», -ҳәа иаҳәоит адышшыларатә шәҟәы аҿы.