Иахьа аҳҭнықалақь аҿы изызҳауа аҵлақәа рҭагылазаашьа еиҳа еиӷьзар ҟалон, ҳәа иазгәеиҭеит Аԥсны анаукақәа Ракадемиа иатәу аекологиа Аинститут аентомологиа алабораториа аиҳабы Михаил Қриа. Аеколог агәра ганы дыҟоуп, иарбоу аусхкы аҿы асистемала аусеицура мацарала ауп хра злоу алҵшәақәа раарԥшра шалшо.  

Акомиссиа аусура арӷәӷәаразы, уи алҵшәақәа реиӷьтәразы, ақалақь ахада Ҭемыр Агрба  иӡбамҭала, ареспубликахь раԥхьаӡа акәны ааԥхьара иҭан арборист – аҵиаақәа рхылаԥшразы аспециалист. Аҟәа ақалақь Ахадара анапхгараҭара аҳҭнықалақь ариаҵәара ҷыдала ахшыҩзышьҭра анаҭалоит.