Гульнара Кичба «Амчреи ауаажәлари: хра злоу аусеицура астратегиақәа» («Власть и общество: успешные стратегии взаимодействия») атема ала ажәахә ҟаҵо дықәгылеит. Уи лажәахә аҿы аҳәынҭқарратә структурақәеи ауаажәларратә еилазаареи рыбжьара аусеицура абжьаҵара иаҵоу аҵакы ахадара дазааҭгылеит. Лара лықәгылара аусмҩаԥгатә иалахәыз акыр иазҿлымҳахеит, ахцәажәарақәа рацәаны иаиуит.

Афорум аҳәаақәа ирҭагӡаны иара убас имҩаԥысит Урыстәыла Ауаажәларратә Палата амаӡаныҟәгаҩ Лидиа Михеевеи уи лхаҭыԥуаҩ Алеқсандр Школьники рԥылара. Аиԥылара аҿы анаҩстәи аусеицура ацҵареи аԥышәаеимадареи аусеицуреи рзы иҿыцу алшарақәа аазыртуа аԥшьгарақәа реицынагӡареи иадҳәалоу азҵаарақәа жәпакы ирылацәажәеит.

Афорум иара убас иформалым аимадареи иҿыцу аконтактқәа рыбжьаҵареи рзы хра злоу плошьадканы иҟалеит. Уи ҳәарада ҳаԥхьаҟа еиуеиԥшым аусхкқәа рҿы аусеицура арҿиара иацхраауеит.  

Афорум «Сообщество» алахәхара иабзоураны Аԥсны Ауаажәларратә Палата аделегациа ауаажәларратә еилазаара аус рыцура иадҳәалоу иԥхьагылоу аԥышәеи аинновациатә знеишьақәеи рдырразы алшара роуит.