Аҟәа. Жьҭаарамза 17, 2022 шықәса. Аԥсныпресс. Жьҭаармза 21, 2022 шықәса рзы П. И. Чаиковски ихьӡ зху Москватәи аҳәынҭқарратә консерваториа, Рахманин изал аҿы, Москватәи аԥсуа диаспора (МАД), Урыстәыла иҟоу Аԥсны Аҳәынҭқарра Ацҳаражәҳәарҭа, Аԥсны акультура Аминистрра иҟарҵаз адгылара иабзоураны, акультуратә программа «Аԥсны-Урыстәыла» аҳәаақәа ирҭагӡаны, аклассикатә музыка аконцерт мҩаԥысуеит. Абри азы адырра ҟанаҵоит Москватәи аԥсуа диаспора (МАД) апресс-маҵзура.
Аконцерт амҩаԥгаҩ – Р. Д. Гәымба ихьӡ зху аԥснытәи аҳәынҭқарратә филармониа асахьаркыратә напхгаҩы Есма Џьениа. Апроект автор – Виктор Абрамиан-Ешба. Аконцерт апрограмма иалагалоуп урыстәылатәи, аԥснытәи, европатәи акомпозиторцәа рырҿиамҭақәа.
Аконцерт рхы аладырхәуеит Аԥсны Аҳәынҭқарра акамертә оркестр асолистцәа: Елена Ҳагба (меццо-сопрано), Аԥсны аҳәынҭқарратә филармониа асолистка; Нана Черқьезиа (сопрано); жәларбжьаратәи аконкурсқәа рлауреат Мариа-Емилиа Терзиан-Ҳагба (аскрипка); жәларбжьаратәи аконкурсқәа рдипломант Виктор Абрамиан-Ешба (аскрипка); Адирижиор – жәларбжьаратәи аконкурс алауреат Барас Кәыџба.
Иара убас аконцерт рхы аладырхәуеит П. И. Чаиковски ихьӡ зху Москватәи аконсерваториа астудентцәа Рхортә ансамбль иалаху: Маргарита Гладышева; Вилиам Хаило; Лана Адлеиба (афортепиано); Москватәи аҳәынҭқарратә академиатә филармониа (МГАФ) асимфониатә оркестр асолист Станислав Савва (альт); Анна Ченчикова (альт); Софиа Деева (авиолончель); Даниил Владыко (авиолончель); Анагӡаратә ҟазара Академиа амузыкатә школ Хада астудентка Каииа Хупориа (афортепиано).
Абилеҭқәа рҭиуеит П. И. Чаиковски ихьӡ зху Москватәи аҳәынҭқарратә консерваториа акассақәа рҿы.
Аконцерт алагара аамҭа: 19:00.
