Атуризм аминистр  Ҭемраз  Логәуа еизаз зегьы ари аныҳәа рыдиныҳәалеит, афестиваль аиҿкааҩцәагьы иҭабуп ҳәа реиҳәеит ари ишьаху аус ахьеиҿыркааз азы.

«Агәра згоит шәара зегьы доусы шәхазы еиҳа ишәгәаԥхо џьара акы шалышәкаауа. Бзиала шәаабеит Аԥсныҟа! – ҳәа иҳәеит иара.

Афестиваль аиҿкааҩ Светлана Габуниа афестиваль аиҿкаараҿы ацхыраара ҟазҵаз зегьы иҭабуп ҳәа ралҳәеит, ҷыдала Урыстәыла аҟынтәи ироуз ацхыраара алкааны.

«Ари аусмҩаԥгатә зыбзоурала аиҿкаара алыршахаз, ацхыраареи адгылареи ҟазҵаз  зегьы иҭабуп ҳәа раҳҳәарц ҳҭахуп. Иара убас ҳколлектив зегьы ахьӡала иҭабуп ҳҳәоит ҳҩыз ду – Урыстәыла аганахьала иҳауз адгылара ду азы. Апроект сынтәа нагӡахоит Урыстәылатәи Афедерациа Ахада игрантқәа Рфонд адгыларала. Ҳгәыӷуеит, иахьа ҳфестиваль «Амандарин»  иаҭааз зегьы агәалаҟазаара бзиа роуп ҳәа», - илҳәеит лара.

Афестиваль аартра иазкыз аныҳәатә концерт аҿы иқәгылеит аԥснытәи аестрада еицырдыруа артистцәа Лиудмила Гәымба, Саида Агрба, Саида Габниа, амузыкатә гәыԥ «Ианаи», ансамбль «Гәында», уҳәа егьырҭгьы.  

Асааҭ 16:00 рзы уааҵәҟьа аплошьад аҿы акәашаратә хәмаррақәа мҩаԥысит.  

Амш хыркәшахоит узыршанхо афаер-шоу ала.